Illum Malta tilgħab it-tielet partita minn erbgħa u t-tieni waħda minn Grupp D2 tal-UEFA Nations League meta fl-Istadium Nazzjonali taffronta lill-Estonja.
It-team immexxi minn Devis Mangia għadu ġej minn rebħa ta’ 2-0 barra minn darna kontra San Marino wara li kien tilef il-partita ta’ ħbiberija kontra Venezwela bl-iskor ta’ 1-0, f’nofs il-ġimgħa li għaddiet.
Sadanittant fil-logħba li ntlagħbet f’Serravalle, il-Ħadd li għadda, il-Maltin kellhom wirja mill-aqwa fit-tieni taqsima wara li dik ta’ qabel il-mistrieħ kienet waħda diżappuntanti minkejja li konna aħjar mill-avversarji.
Iżda permezz tas-sostituzzjonijiet li wettaq Mangia wara l-mistrieħ, it-team Malti kien għal kollox trasformat u meritatament ħareġ rebbieħ.
Iżda fil-veritá ħadd ma kien jaf x’jiġri li kieku l-avversarji ngħataw penalty ivvintat li oriġinarjament ir-referee saffar għalih. Iżda mbagħad wara verifikazzjoni mal-VAR, l-istess penalty ma ġiex konvalidat.
Wara dan l-episodju assistejna għal żewġ goals kapolavuri … minn Jan Busuttil u Matthew Guillaumier … biex taw l-ewwel rebħa lil Maltin fl-ewwel dehra tagħhom ta’ din l-edizzjoni.
L-avversarji tal-lum huma l-Estonja, li proprju rebħu l-ewwel partita ta’ dan il-grupp meta, f’Tallinn, għelbu lil San Marino’ 2-0.
Din hija partita importanti minħabba li min joħroġ rebbieħ jillidja l-klassifika u jkun b’ċans tajjeb li jikkwalifika li jiġi promoss għal-League C.
Fil-kummenti tiegħu għal dan il-konfront, il-coach nazzjonali sostna li t-team jinsab fid-direzzjoni t-tajba meta qal:
“Ma rridx niftaħar bl-istil tal-football tagħna. Irrid inħalli lil ħaddieħor jitkellem għat-talenti li għandna.
“Il-punti huma importanti iżda nemmen li l-logħba deċiżiva mhijiex dik tal-lum iżda dik fl-Estonja li se tintlagħab f’Settembru li ġej.
Huwa spjega li r-rebħa kontra San Marino nisslet kunfidenza fil-players.
“Din ir-rebħa tatna fiduċja, iżda minkejja li l-Estonja għelbu lill-istess team bl-istess skor ta’ 2-0, wieħed ma jistax iqabbel iż-żewġ logħbiet.
“Il-paraguni xi kultant huma odjużi. Se ninżlu fil-ground, nagħmlu l-almu tagħna, nilagħbu l-istil tal-football tagħna u nħallu r-riżultat jitkellem,” temm jgħid Mangia.
Tkellem ukoll il-captain, Steve Borg, li tenna: “Id-differenza ta’ din il-logħba hija li rridu nirbħu u mhux li għandna nirbħu. Aħna ninsabu fi grupp tajjeb u l-players kollha huma mportanti minħabba li nilagħbu għal xulxin b’mod kollettiv.”
L-Estonja jinsabu rrankjati fil-110 post tal-FIFA u huma mmexxija mill-coach Svizzeru, Thomas Haberli.
Huwa għażel skwadra bi players ta’ esperjenza mħallta b’talenti żgħażagħ.
Fost il-players li jilagħbu fi clubs prestiġjużi hemm Maksim Paskotsi li jinsab fuq il-kotba ta’ Tottenham Hotspur u Karl Jakob Hein li jilgħab ma’ Arsenal.
L-aktar player ta’ esperjenza huwa l-captain Konstantin Vassilyev li lagħab 141 darba għal pajjiżu.
Nhar il-Ħadd l-Estonja lagħbet partita ta’ ħbiberija kontra l-Arġentina fejn spiċċaw tilfu 5-0 bil-ħames goals jiġu skorjati minn Lionel Messi.
Din se tkun is-seba’ logħba fejn il-bilanċ bejn iż-żewġ timijiet huwa wieħed assolut … b’żewġ rebħiet kull wieħed u żewġ draws.
