Żmien is-sajf huwa meqjus minn ħafna bħala dak il-perjodu li matulu tistrieħ aktar mis-soltu, tgawdi l-klima sabiħa tagħna, tgawdi l-festi uniċi fil-pajjiż, tqatta’ xi ftit jiem barra mill-pajjiż u tagħmel aktar minn dak li jagħtik gost. Il-ġurnata titwal u t-temp jippermetti wkoll.
Ma jfissirx iżda li l-ħidma tieqaf, pjuttost il-kontra. Dan huwa żmien delikat, għall-Gvern u għall-pajjiż, għax bħalissa jsir il-qafas ta’ dak li se jkun il-pjan finanzjarju tal-pajjiż għas-sena 2019. Qed nirreferi għall-Baġit, li d-dettalji kollha dwaru nkunu nafuhom f’Ottubru li ġej. Hawnhekk nista’ nassigura li kif ġara fl-aħħar snin, se nerġgħu naraw Baġit li jkompli jibni fuq dak li diġa’ wettaqna.
Baġit li se jkompli jagħti nifs lil min jiflaħ l-inqas, filwaqt li jkompli jsaħħaħ il-‘middle class’ li fl-aħħar snin baqgħet ittejjeb il-livell tagħha.
Għal darb’oħra se nkomplu nagħtu l-għajnuna lill-pensjonanti, faxxa tant importanti f’pajjiżna u li qed tkompli tikber aktar ma jgħaddi ż-żmien. Irridu nifhmu d-demografja tal-pajjiż, qed naraw popolazzjoni li dejjem qed tixjieħ. Il-Gvern huwa konxju ta’ dan il-fatt, għalhekk se nkomplu ninvestu fl-anzjani u l-pensjonanti tagħna li tant ħadmu biex dan il-pajjiż qiegħed fejn qiegħed illum.
Kif qal il-Prim Ministru, il-pensjonanti kollha se jerġgħu jibbenefikaw minn żieda fil-pensjoni tagħhom. Din se tkun ir-raba’ żieda għall-anzjani tagħna matul l-aħħar snin ta’ Gvern Laburista. Il-pensjonanti tagħna se jerġgħu jibbenefikaw minn żieda oħra fil-pensjoni tagħhom minbarra l-kumpens għall-għoli tal-ħajja. Pass ieħor li se jwassal biex fuq medda ta’ snin, il-pensjonanti jkollhom pensjoni minima nazzjonali li tkun ogħla mill-linja tar-riskju tal-faqar.
Il-mandat tal-Gvern huwa; li kif imwiegħed fil-manifest elettorali; f’din il-leġiżlatura l-pensjoni tiżdied b’minimu ta’ €8 fil-ġimgħa u hekk se jsir. Dawn iż-żidiet konsekuttivi jikkuntrastaw bil-kbir mal-limbu li għexna f’25 sena ta’ Gvernijiet Nazzjonalisti.
Esperjenzajna żminijiet, fejn mijiet ta’ anzjani kienu mċaħħda mill-aktar affarijiet bażiċi, ma setgħux ikessħu jew isaħħnu djarhom, oħrajn li ma setgħux ilaħħqu mal-ħajja. Illum tejbu l-livell tal-għijxien tagħhom, grazzi għaż-żieda fil-pensjonijiet u għadd ta’ miżuri soċjali oħrajn.
Mhux se jkunu biss l-anzjani, li se jaraw żidiet u titjib, iżda se naraw imbuttatura soċjali oħra, li se tkompli tpoġġi lil Malta fuq nett fejn jidħlu servizzi u miżuri soċjali, fost l-Ewropa kollha. Għal darb’oħra l-Gvern se jkompli jindirizza inġustizzji u anomaliji tal-passat, fosthom ma’ membri tal-korp tal-pulizija, eks-ħaddiema tal-korpi, eks-ħaddiema tax-Xatt u eks-ħaddiema tal-Malta Electricity Board.
Dawn iż-żidiet huma possibbli għax il-Gvern għandu ekonomija b’saħħitha u rreġistra surplus li qiegħed iservi biex jgħin lill-familji u l-pensjonanti Maltin u Għawdxin. Nawguralkom sajf mimli mistrieħ, gawdu lill-familja, filwaqt li nħeġġeġ biex dejjem nippruvaw nagħtu eżempju tajjeb u pożittiv lill-uliedna u lil kulħadd.
