WU SHU KY Kickboxing flimkien ma’ Team Boom Combat Forge jirrappreżentaw lil Team Malta fil-Kampjonati WMAC fis-Slovenja
It-Tim WU SHU KY Kickboxing flimkien ma’ Team Boom Combat Forge irrappreżenta bi kburija lil Team Malta matul il-jiem li għaddew fil-Kampjonati WMAC fis-Slovenja.
Ġewwa l-villaġġ u l-kumpless sportiv ta’ Podčetrtek, post sabiħ ħafna u magħruf sew għat-termal spas u n-natura kwieta tiegħu, sar dan l-avveniment fejn it-tim nazzjonali Malti kkompeta fil-European Championships u reġa’ ħareġ bl-unuri.
Kontinġent ta’ 30 ruħ Malti, wieħed jissapportja lill-ieħor. L-għaqda li kien hemm, immexxija mill-Instructor Wayne Camilleri, sfortunatament mhux dejjem issibha f’pajjiżna. Pajjiż żgħir fejn flok ningħaqdu u niġbdu ħabel wieħed għall-Combat Sports, kultant ikun hemm battibekki kontinwi — però mhux f’dan il-każ.
L-għaqda u s-sapport li rajna kienu eżempju ċar ta’ kif għandhom ikunu l-clubs lokali.
L-istudenti kisbu esperjenza internazzjonali importanti u nkisbu riżultati eċċellenti:
Alec Bonnici – 1° Post fil-Kickboxing Light
Jake Fenech – 2° Post fil-K1
Mikael Sammut – 3° Post fil-K1 u Oriental Boxing
Liam Vella Cappello – 3° Post fil-Kickboxing Light
Kaylen Borg Naudi – 3° Post fil-Kickboxing Light
Reinaldo Dijeri – 3° Post fil-Kickboxing Light
Zdenik Grima – 3° Post fil-Kickboxing Light (Juniors)
Kelson Grima – 3° Post fil-Kickboxing Light (Juniors)
Jaid Agius kiseb l-ewwel post fl-Oriental Boxing fejn iddomina r-ring b’żewġ KO fights, u tela’ sal-finali fejn akkwista ċ-ċinturin tar-rebħa.
L-esperjenza li jiksbu dawn l-atleti mhijiex biss fl-isport u l-kompetizzjoni li jipparteċipaw fiha, iżda wkoll fil-fatt li raw b’għajnejhom postijiet kulturali sbieħ bħal Lake Bled u n-natura li s-Slovenja hija magħrufa għaliha.
Nixtieq nieħu l-okkażjoni biex nirringrazzja lil SportMalta talli approvat l-isport leave għall-atleti u l-uffiċjali tat-tim nazzjonali Malti, lit-Tabiba Dr Nicole Meli, lill-fotografu u atleta Manwel Grima, kif ukoll lill-coaches Alan Borg, Wayne Camilleri, Robert Cassar u Jesred Piscopo.
It-tim nazzjonali Malti jixtieq ukoll jirringrazzja lil Visit Malta tas-sapport kontinwu tagħhom f’dawn l-avvenimenti internazzjonali, fejn dejjem ikunu ta’ għajnuna kbira biex l-atleti Maltin ikunu jistgħu jirrappreżentaw lil pajjiżna bl-aqwa mod possibbli.
Il-kontinġent issa se jibda jipprepara għall-World Championships li se jsiru ġewwa Bregenz, l-Awstrija.
