Il-popolarità tal-ivjaġġar bil-Fast Ferry kompla jikber matul l-2026, tant li sal-aħħar tas-sena huwa mistenni li jkunu użaw dan il-mezz tat-trasport xejn inqas minn żewġ miljun passiġġier. Dan jimmarka żieda konsiderevoli mit-total ta’ 1.2 miljun passiġġier li użaw il-Fast Ferry fl-2025.
Notevoli huwa l-fatt li fl-2026, minn Mejju, bdiet topera rotta ġdida – jiġifieri dik li titlaq minn Tas Sliema, tieqaf Buġibba u tkompli għal Għawdex.
Sal-aħħar ta’ Settembru kienu diġà saru 7,419-il vjaġġ fuq ir-rotta Belt Valletta – Għawdex, filwaqt li huwa mistenni li jsiru madwar 3,000 vjaġġ ieħor sal-aħħar tas-sena.
Sal-aħħar ta’ Settembru kienu saru 6,646 vjaġġ bil-Fast Ferry fuq ir-rotta Tas-Sliema – Buġibba – Għawdex. Sal-aħħar tas-sena huwa mistenni li jsiru madwar 4,000 vjaġġ ieħor. Din ir-rotta bdiet topera nhar il-5 ta’ Mejju li għadda.
Fuq ir-rotta Kottonera – Belt Valletta, din is-sena sal-aħħar ta’ Settembru kienu diġà saru ftit inqas minn 14,000 vjaġġ, b’4,588 oħra stmati li se jkunu saru sal-aħħar tal-2026.
Fl-2025 kienu saru total ta’ kważi 19,000 vjaġġ.
F’kummenti mat-Torċa, il-Ministru għall-Mobilità Sostenibbli Chris Bonett saħaq dwar l-importanza ta’ din l-alternattiva kruċjali fil-qasam tat-trasport u l-mobilità. Żied jgħid li l-Gvern ma bediex dawn it-tliet rotot u waqaf hemm:
“Aħna bqajna nisimgħu u naraw x’inhi s-sitwazzjoni ta’ kull rotta u anke nisimgħu l-ilmenti ta’ diversi passiġġiera. Fosthom kien hemm min ilmenta li s-servizz minn Tas-Sliema għal Għawdex kien qed jispiċċa kmieni wisq filgħaxija u allura ma kienx vijabbli għalihom.”
Huwa kompla jirrimarka li dan kollu waslu sabiex iħabbar l-estensjoni tas-servizz għas-sajf u żvela kif “fil-ġimgħat li ġejjin se nħabbru wkoll l-estensjoni għax-Xitwa, speċjalment għas-servizz matul il-jum biex inħeġġu aktar nies iħallu l-karozza d-dar meta jmorru għax-xogħol.”
Mat-Torċa l-Ministru Bonett ħabbar ukoll li bħalissa għaddejjin diversi studji u diskussjonijiet dwar rotot oħra ġodda tal-Fast Ferry, fosthom dawk ċirkolari, fuq distanzi iżgħar, b’dgħajjes iżgħar, bħal minn Tas-Sliema għal San Ġiljan.
Fil-programm elettorali tal-Partit Laburista ‘Int Malta’ huwa propost li s-servizz tal-Fast Ferry jibda jopera min-nofsinhar ta’ Malta wkoll – iġifieri minn Wied il-Għajn sal-Belt Valletta.
“Il-ferries huma parti importanti mill-proġett Malta in Motion,” qal il-Ministru għall-Mobilità Sostenibbli li fakkar illi din hija sistema sħiħa; mit-trasport pubbliku sal-fast ferry, l-użu tat-trasport bħar-roti u s-sistema ta’ trasport tal-massa (light rail).
