L-umpire internazzjonali Malti Alessandro Amore kompla jsaħħaħ ir-reputazzjoni tiegħu fix-xena Ewropea tal-hockey hekk kif temm b’suċċess l-impenji tiegħu fil-EuroHockey Championship Qualifier II tal-irġiel, li sar f’Helsinki, il-Finlandja. Il-kompetizzjoni laqqgħet seba’ timijiet Ewropej li kkompetew għal post fil-fażi finali tal-Euro Hockey 2027.
Amore kien magħżul biex jikkontrolla erba’ logħbiet matul it-turnew kollu, inkluża l-konfront bejn il-Finlandja u l-Greċja u l-play-off għall-ħames u s-sitt post bejn l-Ungerija u l-Finlandja. Dan kien l-aħħar impenn tiegħu f’din il-kompetizzjoni.
Il-fatt li ġie fdat b’dawn il-logħbiet kollha jkompli juri l-fiduċja li l-EuroHockey għandha fil-kapaċitajiet tiegħu, fil-konsistenza u fil-professjonalità li juri fuq livell internazzjonali. Din hija kisba oħra importanti kemm għal Amore kif ukoll għall-hockey Malti, li jkompli jkun rappreżentat b’mod pożittiv fil-kompetizzjonijiet Ewropej.
