Il-pulizija fil-Polonja qed tinvestiga l-qtil ta’ artist Russu u kritiku vokali tal-President Vladimir Putin. Il-prosekuturi Pollakki qalu li Robert K, magħruf bħala l-artist Semyon Skrepetsky, inqatel b’tiri ta’ arma tan-nar nhar it-Tnejn filgħodu fil-belt Pollakka ta’ Biała Podlaska, madwar 40km mill-fruntiera mal-Belarus.
L-artist li kellu 44 sena ntlaqat b’ħames tiri f’rasu, f’sidru u f’dahru f’parkeġġ fil-belt, li tinsab madwar 600 metru bogħod mill-konsulat tal-Belarussu.
Semyon Skrepetsky kien l-isem fittizzju li kien juża Robert Kuzovkov. Huwa kien magħruf għall-karikaturi tiegħu ta’ politiċi, inklużi Putin, il-mexxej tal-Belaruss Alexander Lukashenko u l-mexxej Ċċen Ramzan Kadyrov.
Il-pulizija żammet żewġ ċittadini Belarussi, ta’ 33 u 37 sena, ħdejn il-konsulat Belarussu fil-belt u r-rwol tagħhom fl-inċident għadu qed jiġi determinat, skont ma qal kelliem għall-uffiċċju tal-prosekutur distrettwali fil-belt tal-lvant ta’ Lublin.
Skrepetsky ingħata ażil f’Biała Podlaska, belt żgħira b’popolazzjoni ta’ inqas minn 60,000, wara li telaq mir-Russja fl-2021 minħabba l-biża’ ta’ prosekuzzjoni kriminali.
L-Uffiċċju tal-Prosekutur qal li Kuzovkov ġie avviċinat minn raġel armat mhux identifikat li spara żewġ tiri lejh. Meta l-vittma waqa’ mal-art, ir-raġel armat resaq lejh u sparalu tliet tiri oħra u mbagħad ħarab minn fuq il-post tad-delitt.
Robert K kien involut f’bosta attivitajiet artistiċi pubbliċi u uża fost affarijiet oħra, il-psewdonimu Semyon Skrepetsky, li bih esprima kritika għall-politiki attwali tal-awtoritajiet tal-Federazzjoni Russa.
Il-karikaturi satiriċi ta’ Skrepetsky kienu wrew lil Putin f’dirgħajn id-dittatur Sovjetiku Joseph Stalin, lil Lukashenko bħala Adolf Hitler b’barmil patata u lil Kadyrov u ibnu Adam b’imnieħer ta’ ħnieżer.
Ix-xogħol tiegħu ġie ppubblikat fuq Telegram u fuq il-kanal tiegħu ta’ YouTube. Skrepetsky se jibqa’ mfakkar fil-Polonja minn martu u ħamest uliedu.
Filmat li tpoġġa fuq il-midja soċjali l-lejl ta’ qabel mewtu wera lill-artist jattendi protesta ta’ Jum ir-Russja barra l-ambaxxata Russa f’Berlin nhar il-Ġmgħa.
Huwa deħer li kien qed iġorr pittura li tikkarikatura lil Vladimir Putin u lill-mexxej Sovjetiku Joseph Stalin, kif ukoll bandiera Russa marbuta mal-qalziet tiegħu li kienet tkaxkar mal-art.