B’investiment ta’ €1.2 miljun mid-Dipartiment tax-Xogħlijiet Pubbliċi fil-jiem li ġejjin se jibdew ix-xogħlijiet fuq il-bandli ta’ quddiem l-Imdina.
Ħabbar dan il-Ministru għat-Trasport, Infrastruttura u Proġetti Kapitali Ian Borg waqt konferenza stampa li indirizza dalgħodu bit-tema “Malta li rridu għal uliedna.”
Fid-diskors tiegħu, il-Ministru Borg spjega li b’dan il-proġett, il-familji se jkollhom iżjed spazju miftuħ għalihom fejn jistgħu iqattgħu ħin ta’ kwalità flimkien.
Sadanittant, huwa għamel referenza wkoll għal diversi proġetti oħra li entitajiet differenti qed jaħdmu fuqhom, fosthom dak tal-Għeriexem u l-Malta National Park f’Ta’ Qali.
Ma naqasx milli jsemmi wkoll il-Budget 2022 se jkompli jsaħħaħ is-setturi tat-trasport u l-infrastruttura bid-diversi miżuri li ġew ippreżentanti. Fost dawn hemm il-miżura tat-trasport b’xejn għal kulħadd, li se tiżgura li jkollna arja aktar nadifa u trasport iżjed sostenibbli.
Huwa qal li “se tkun qiegħda tiżdied l-għotja finanzjarja bħala inċentiv biex aktar nies jixtru vetturi li jaħdmu bl-elettriku. Se nkomplu wkoll ninċentivaw lil min jixtri muturi, scooters u anke roti.”
Il-Ministru Borg qal ukoll li hemm allokati fondi għal iżjed investiment fl-infrastruttura, kemm dik marittima kif ukoll għall-konnettività bejn il-gżejjer.
Dwar it-trasport tal-massa, il-Ministru Borg qal illi dan il-Gvern se jkompli jisma’ x’għandhom xi jgħidu n-nies, u “qegħdin infittxu fondi Ewropej biex ngħaddu għall-fażijiet ta’ studji li jmiss fuq dan il-proġett propost.”
“Apparti minn hekk, se nkomplu nimmodernizzaw it-toroq tagħna u infrastruttura kritika oħra bħall-faċilitajiet tal-heliport fix-Xewkija. Hemm ukoll il-proġett tal-mini ta’ Ħal Kirkop u l-Intersezzjoni tal-Ajruport, l-underpass tal-Imrieħel fost ħafna proġetti infrastrutturali oħra,” tenna l-Ministru Ian Borg.