Team Greens kellhom bidu mill-aqwa fit-30 Edizzjoni tal-Visit Malta Tour ta’ Malta Cycling, b’riżultati fuq il-podju f’diversi kategoriji u r-rebħ tal-flokk l-aħmar fl-ewwel Individual Time Trial li sar dalgħodu f’San Ġwann.
L-ewwel stadju kien jikkonsisti f’Individual Time Trial ta’ 11.1km fuq għaxar dawriet, b’parteċipazzjoni qawwija kemm ta’ ċiklisti lokali kif ukoll barranin. Ir-rikkieb ta’ Team Greens Giuseppe Seggio rebaħ il-kategorija Elite b’ħin ta’ 18-il minuta u 55 sekonda, u kiseb il-prestiġjuż flokk l-aħmar. Sieħbu fit-tim Clive Ebejer kiseb ukoll post fuq il-podju meta spiċċa fit-tielet post b’ħin ta’ 19-il minuta u 30 sekonda, u b’hekk Team Greens kellhom ġurnata memorabbli.
Fil-kategorija tan-Nisa, Marie Claire Aquilina tat prestazzjoni oħra b’saħħitha għal Team Greens u spiċċat fit-tielet post b’21 minuta wara Ellie Mitchinson (Brother UK – On Form) u Gemma Mitchell (FTP Racing Team).
Fil-kategorija Masters, Carmelo Nicolosi (Team Sparkle Scicli – Sicilia) rebaħ b’ħin ta’ 18-il minuta u 35 sekonda, segwit minn Carmelo Aiello (MTB ASD Rosolini – Sicilia) u David Mitchinson (Sigma Sports Masters – UK).
Fi tmiem l-istadju, il-medalji u l-flokkijiet ħomor ġew ippreżentati minn Julian Pace Bonello, President tal-Kumitat Olimpiku Malti, flimkien ma’ Domenic Cassar u Salvatore Debono, Sindku u Kunsillier ta’ San Ġwann.
L-organizzaturi appellaw ukoll għall-koperazzjoni tal-pubbliku fir-rigward tal-għeluq tat-toroq matul il-weekend sabiex tiġi assigurata s-sigurtà taċ-ċiklisti u l-ispettaturi kollha.
It-Tour ikompli għada, is-Sibt 25 ta’ April, fiċ-ċirkwit ta’ San Martin, fejn il-kategorija Elite ser tikkompeti fuq tmien dawriet (62.72km), filwaqt li n-Nisa u l-Masters ser jagħmlu seba’ dawriet (54.88km).
L-avveniment ta’ tlett ijiem jintemm il-Ħadd 26 ta’ April fuq iċ-ċirkwit ta’ St Paul’s Bypass, bit-tiġrijiet jibdew fis-7:30am. Il-kategorija Elite ser tagħmel 12-il dawra (64.92km), filwaqt li n-Nisa u l-Masters jagħmlu 10 dawriet (54.1km).
