Dan il-Milied, l-Esplora se jittrasforma ruħu fil-fabbrika STEM ta’ Santa Klaws fejn se jkun hemm varjetà meraviljużja ta’ shows interattivi, workshops hands-on kif ukoll wirjiet interessanti relatati max-xjenza u li se jkunu addattati għall-viżitaturi ta’ kull età. Matul dan il-perjodu l-viżitaturi huma mistiedna jattendu l-Esplora biex fl-ispirtu tal-festi, jidħlu fid-dinja affaxxinanti tas-suġġetti STEM (Science, Technology, Engineering, and Mathematics).
Is-Segretarju Parlamentari għaż-Żgħażagħ, ir-Riċerka u l-Innovazzjoni, Keith Azzopardi Tanti qal li dan l-avveniment huwa eżempju ċar tal-impenn tagħna li niżguraw li t-tfal u żgħażagħ ikollhom l-opportunità li jesploraw, jesperimentaw, u jitgħallmu f’ambjent li jqanqal il-kurżità u l-potenzjal tagħhom. “Billi nagħmlu s-suġġetti STEM aċċessibbli, qegħdin inrawmu forza tax-xogħol li tmexxi l-progress, tħeġġeġ it-tkabbir ekonomiku, u tibni futur isbaħ għal kulħadd,” tenna Azzopardi Tanti.
Il-pubbliku huwa mħeġġeġ jattendi biex jiskopri l-maġija assoċjata ma’ dawn il-ġranet ta’ festi billi josserva l-Milied mil-lenti tal-innovazzjoni u t-teknoloġija. Kull min jattendi dan l-avveniment se jiskopri xi rwol għandha x-xjenza u kif din taffettwa diversi aspetti tal-Milied — mill-ikel staġjonali għall-meravilja tar-robotika u t-teknoloġija spazjali fost oħrajn. Kull min attenda se jkun jista’ jgawdi varjetà ta’ attivitajiet u shows li lkoll għandhom il-Milied bħala tema. Fost dawn l-attivitajiet jispikkaw Be Our Guest: A Christmas Food Science Show, Once Upon a Christmas, AstroMaterials Lab, Santa’s Sorting Bots u Festive 3D Printing Workshop.
Il-Kap tal-Esplora, is-Sur Olaf McKay tenna li, “B’ħerqa kbira sejrin noffru din l-esperjenza unika lill-pubbliku, u nittamaw li jirnexxielna nqarrbu l-familji flimkien biex bi sfond tal-Esplora joħolqu memorji dejjiema filwaqt li jifhmu aħjar il-versatilità u l-importanza tax-xjenza u s-suġġetti STEM li huma l-qofol ta’ dan iċ-Ċentru.”
L-avveniment se jkun ukoll ikkaratterizzat b’attivitajiet divertenti b’format ta’ Science on the Spot. Waqt attivitajiet bħal Geo-Math-Tree, Holiday Towers, u Roller Coaster Challenge, il-viżitaturi taċ-Ċentru se jingħataw l-opportunità jiddevertu flimkien mal-familji u ħbieb tagħhom billi jegħlbu sfidi li jirrikjedu ftit taħbil il-moħħ biex jibnu xi oġġetti relatati mal-Milied, waqt li jiskopru u jifhmu l-kunċetti xjentifiċi wara dawn l-isfidi. Għall-viżitaturi ċkejknin, l-Esplora ħejja programm speċjali ta’ attivitajiet bħalma hu l-hands on Sense-ational Christmas li joffri esperjenza sensorja, filwaqt li s-show ġdid fjamant li se jintwera fl-Esplora Planetarium Wonders of the Night Sky – Christmas Edition jistieden lill-familja kollha biex timbarka fuq vjaġġ madwar is-sistema solari sabiex tgħin lil Santa Klaws isib ir-rigali li ntilfulu fl-ispazju.
Dettalji tal-Avveniment:
- Dati tal-Avveniment: 21 ta’ Diċembru sal-31 ta’ Diċembru (l-Esplora se jkun magħluq nhar il-25 ta’ Diċembru u nhar l-1 ta’ Jannar)
- Ħinijiet tal-Ftuħ: 10:00 AM – 7:00 PM
- Prezzijiet tal-Biljetti:
- Adulti: €12
- Tfal: €8
- Anzjani: €6
- Diżabiltà u Carer: Bla Ħlas
Il-biljett tad-bħul jinkludi: dħul għall-avveniment u parteċipazzjoni fl-attivitajiet kollha.
Il-biljetti jistgħu jinxtraw minn fuq is-sit elettroniku ta’ Showshappening. Se jkun hemm numru limitat ta’ biljetti għall-bejgħ mal-bieb li se jiġu offruti abbażi ta’ first come, first served.
Għal aktar informazzjoni int mitlub iżur is-sit elettroniku www.esplora.org.mt.
