Immigrant żagħżugħ li ntlaqat minn karozza fl-istess triq fejn xahrejn wara nqatel Lassana Cisse, kien sofra ksur fi spalltu.
Il-ġrieħi li sofra May Malimi, ta’ 19-il sena miċ-Chad, kienu kkonfermati minn speċjalist mediku li ta x-xhieda tiegħu fil-kumpilazzjoni tax-xhieda kontra Francesco Fenech ta’ 21 sena u Lorin Scicluna ta’ 22 sena, eks-suldati mal-Forzi Armati ta’ Malta mixlijin bil-qtil ta’ Cisse.
Fenech u Scicluna qed jiġu mixlijin ukoll bl-attentat ta’ qtil ta’ żewġ immigranti oħrajn fl-isparatura li fiha nqatel Cisse, u kif ukoll bl-attentat ta’ qtil ta’ Malimi.
Il-Qorti preseduta mill-Maġistrat Ian Farrugia semgħet kif il-vittma nhar it-3 ta’ Frar kien miexi Birżebbuġa fid-direzzjoni taċ-ċentru ta’ Ħal Far meta ntlaqat minn karozza.
Iż-żagħżugħ għamel madwar siegħa mal-art qabel ma rnexxielu jerġa’ jqum fuq saqajh u jsejjaħ l-għajnuna.
Tliet ħaddiema tal-AWAS ukoll xehdu li ż-żagħżugħ kien wasal fiċ-Ċentru Miftuħ ta’ Ħal Far mgħejjun minn żewġ immigranti oħrajn.
Il-każ se jitkompla fit-22 ta’ Ottubru li ġej.
Il-Prosekuzzjoni tmexxiet mill-Ispetturi Trevor Micallef u Keith Arnaud, filwaqt li l-Avukati Franco Debono, Amadeus Cachia u Kris Busietta qed jidhru għal Scicluna. L-Avukati Giannella de Marco u Stephen Tonna Lowell qed jidhru għal Fenech.
L-Avukt Joe Giglio qed jidher bħala parte civile.
