Waqt konferenza tal-aħbarijiet, is-Segretarju Parlamentari għas-Sajd, l-Akwakultura u d-Drittijiet tal-Annimali, Alicia Bugeja Said inawgurat proġett infrastrutturali ġdid fil-Port ta’ Marsaskala, li kien jinkludi Winch Room u Service Pillars li se jkunu ta’ servizz dirett u essenzjali għall-komunità tas-sajd u dawk li jagħmlu użu tal-port.
Dan il-proġett jirrappreżenta pass ieħor ’il quddiem fil-viżjoni tal-Gvern biex is-settur tas-sajd ikun aktar professjonali, sigur u sostenibbli. Il-Winch Room se tkun qed tintuża mis-sajjieda biex itellgħu u jniżżlu d-dgħajjes filwaqt li s-Service Pillars se joffru aċċess għall-ilma u l-elettriku, servizzi bażiċi li huma meħtieġa għax-xogħol tas-sajd.
Is-Segretarju Parlamentari Alicia Bugeja Said spjegat kif dan il-proġett huwa parti minn numru ta’ investimenti li ġew imħabbra fil-Budget, bl-għan li jkomplu jsaħħu l-portijiet tas-sajjieda madwar Malta u Għawdex. “Permezz ta’ dawn il-proġetti qed inwieġbu għat-talbiet tas-sajjieda stess, mhux biss f’Marsaskala, imma f’diversi portijiet oħrajn,” sostniet Bugeja Said.
Is-Segretarju Parlamentari ħabbret ukoll li se jiġi introdott servizz ta’ hoisting tat-tonn bla ħlas, disponibbli 24 siegħa kuljum, sabiex tiġi ssimplifikata l-ħidma tal-ħaddiema tas-sajd, partikolarment fir-rigward ta’ ħut kbir bħat-tonn.
“Is-sajjieda tagħna huma parti importanti mill-identità marittima ta’ pajjiżna, u l-Gvern jibqa’ kommess li jkompli jappoġġjahom b’infrastruttura moderna, servizzi effiċjenti u viżjoni fit-tul għall-iżvilupp tas-settur. Kommessi wkoll li nkomplu nindirizzaw l-bżonnijiet tas-settur tas-sajd għax settur tas-sajd b’saħħtu jfisser pajjiż aktar sostenibbli, inklużiv u reżiljenti,” temmet tgħid is-Segretarju Parlamentari Bugeja Said.
L-Aġent Direttur Ġenerali tad-Dipartiment tas-Sajd u l-Akwakultura, Bjorn Azzopardi, spjega kif qed jaraw li dawn is-servizzi jkunu aċċessibbli minn kulħadd, inkluż għaqdiet ta’ sajjieda dilettanti. “L-għan tagħna hu li nissimplifikaw il-ħajja tas-sajjieda u nagħmlu l-ħidma tagħhom aktar faċli u aċċessibbli.”
