Il-General Workers’ Union (GWU) tinsab allarmata serjament bil-preżentata ta’ kwerela kriminali kontra s-Segretarju tat-Taqsima tat-Trasport, Marittima u l-Avjazzjoni tagħha, wara li huwa kkomunika ma’ membri tal-GWU li huma impjegati mar-Resource Support & Services Ltd (RSSL).
Fid-29 ta’ Mejju 2026, il-management tal-RSSL kiteb lill-ħaddiema tal-kumpanija fejn iddeskriva l-proposti mressqa fil-kuntest tan-negozjati li kienu għaddejjin dwar il-ftehim kollettiv mal-GWU. Dawn in-negozjati kienu għadhom ma ntemmewx u l-GWU kienet għadha ma qablitx mal-proposti.
Bosta membri tal-GWU li rċevew din il-komunikazzjoni kkuntattjaw lill-union tagħhom direttament. Huma xtaqu jifhmu x’kien ġie miftiehem sa’ dak il-mument u x’kienet il-pożizzjoni tagħhom.
Is-Segretarju tat-Taqsima għamel dak li kull segretarju responsabbli ta’ trade union huwa fiddmir li jagħmel. Huwa ta aġġornament lill-membri tiegħu dwar l-istat reali ta’ dawk innegozjati. Il-komunikazzjoni tiegħu indirizzat biss kwistjonijiet relatati mal-impjieg.
Ma kien fiha l-ebda kontenut politiku, ma saret l-ebda referenza elettorali, u ma ħaddnet l-ebda pożizzjoni politika. Huwa kien qed iwieġeb għall-mistoqsijiet tal-membri tiegħu dwar il-ftehim kollettiv tagħhom stess – ftehim li kien għadu miftuħ u mhux iffirmat.
Minħabba f’hekk, tressqet kwerela kriminali mill-Kummissjoni Elettorali, li tefgħet lil Azzopardi taħt investigazzjoni fuq allegat ksur tal-jum ta’ silenzju elettorali.
Konsegwentement, Azzopardi ġie interrogat taħt twissija (under caution) mid-Dipartiment talInvestigazzjonijiet Kriminali (CID) tal-Korp tal-Pulizija ta’ Malta.
Il-GWU tirrispetta r-rwol tal-pulizija u tifhem li, wara li tiġi ppreżentata kwerela formali, huma għandhom l-obbligu li jinvestigaw. It-tħassib tagħna mhuwiex dwar il-pulizija. It-tħassib tagħna huwa dwar il-kwerela nnifisha, u dwar dak kollu li tirrappreżenta.
Segretarju ta’ union li jżomm lill-membri tiegħu infurmati dwar il-ftehim kollettiv tagħhom mhuwiex qed jagħmel kampanja. Huwa qed jagħmel xogħlu. Id-dritt tal-ħaddiema li jiffurmaw u jissieħbu f’unions, u d-dritt ta’ dawn l-unions li jorganizzaw l-attivitajiet tagħhom u jikkomunikaw mal-membri tagħhom, huma drittijiet fundamentali protetti taħt il-Konvenzjoni Nru 87 tal-ILO dwar il-Libertà ta’ Assoċjazzjoni u l-Protezzjoni tadDritt għall-Organizzazzjoni, kif ukoll il-Konvenzjoni Nru 98 tal-ILO dwar id-Dritt għall- Organizzazzjoni u n-Negozjar Kollettiv, li t-tnejn li huma ġew ratifikati minn Malta.
Barra minn hekk, il-Konvenzjoni Nru 135 tal-ILO tkompli tipproteġi lir-rappreżentanti tal-ħaddiema kontra atti li jagħmlulhom ħsara li jistgħu jirriżultaw mit-twettiq tal-funzjonijiet rappreżentattivi tagħhom.
L-organi ta’ supervizjoni tal-Organizzazzjoni Internazzjonali tax-Xogħol (ILO), inkluż ilKumitat dwar il-Libertà ta’ Assoċjazzjoni, konsistentement irrikonoxxew li l-unions għandhom ikunu ħielsa li jwettqu l-funzjonijiet rappreżentattivi leġittimi tagħhom, inkluż li jikkomunikaw mal-membri tagħhom dwar negozjar kollettiv u kwistjonijiet ta’ impjieg, mingħajr indħil mhux xieraq mill-awtoritajiet pubbliċi.
Il-GWU infurmat uffiċjalment lill-Konfederazzjoni Ewropea tat-Trade Unions (ETUC) dwar din il-kwistjoni, bl-ETUC taqsam magħna l-istess tħassib serju tagħha. Id-drittijiet tat-trade unions mhumiex negozjabbli, u kull tentattiv biex dawn jiġu rrestritti – ikun xi jkun il-mod kif jiġi ppreżentat – se jiġi kkontestat f’kull livell possibbli għalina.
Is-Segretarju Ġenerali tal-GWU, Kevin Camilleri, iddikjara: “L-ewwel dmir ta’ segretarju ta’ union huwa lejn il-membri tiegħu. Meta l-ħaddiema jikkuntattjaw lill-union tagħhom biex ifittxu kjarezza dwar il-ftehim kollettiv tagħhom stess, is-segretarju huwa fid-dmir li jwiġibhom. Dan mhu ksur ta’ ebda liġi – huwa l-aktar rwol bażiku u fundamentali li twettaq trade union. IlGWU mhi se taċċetta qatt sitwazzjoni fejn uffiċjal jiffaċċja proċeduri kriminali sempliċiment talli wettaq dmiru. Se niddefendu lis-segretarju bis-sħiħ, u se nressqu din il-kwistjoni
quddiem kull korp internazzjonali li jeżisti biex jipproteġi l-libertà tat-trade unions.”
Il-pożizzjoni tal-GWU hija waħda ċara. In-negozjar kollettiv u r-rappreżentanza tal-ħaddiema huma funzjonijiet li joperaw taħt il-qafas legali tagħhom stess, ibbażat fuq il-liġi nazzjonali u fuq obbligi internazzjonali li huma fis-seħħ. Il-leġiżlazzjoni elettorali ma tissostitwixxix u lanqas ma tnaqqas minn dan il-qafas.
Segretarju ta’ union li jikkomunika mal-membri tiegħu dwar l-impjieg tagħhom ikun qed jeżerċita dritt li jeżisti b’mod indipendenti minn kull
kalendarju elettorali. Aħna se nibqgħu spalla ma’ spalla mas-Segretarju tat-Taqsima.
Se nkomplu naġġornaw lillmembri tagħna dwar kull kwistjoni li tikkonċerna l-impjieg tagħhom. U se nkomplu naqdu
dmirijietna bħala trade union mingħajr biża’.