Il-pulizija Franċiża kontra t-terroriżmu sparaw fuq mara li ma kinitx armata wara li allegatament bdiet thedded lil persuni waqt li kienu mexjin f’Pariġi.
Sors fi ħdan il-pulizija qal lill-BBC li huma intervjenew fl-istazzjon tal-ferrovija Bibliothèque François-Mitterrand.
Il-mara, li kienet liebsa velu sħiħ, allegatament heddet li tisplodi lilha nnifisha. Wara li rrifjutat li tikkopera mal-pulizija, dawn allegatament sparaw fid-direzzjoni tagħha.
Il-mara nstemgħet tgħajjat “Allahu Akbar. Dan l-istess sors qal li l-“pulizija kienu qed jibżgħu għas-sigurtà tagħhom.”
Huwa mifhum li l-mara tinsab f’qagħda kritika iżda stabbli wara li ntlaqtet minn tiri ta’ arma tan-nar f’żaqqha.
