Il-Pulizija rnexxielha tasal għall-persuna li allegatament ta n-nar f’kumpless ta’ garaxxijiet f’Tas-Sliema mit-tattoos li kellu fuq idejh u torċ misruq.
Il-kumpilazzjoni kontra Ion Busuioc ta’ 24 sena mir-Rumanija kompliet il-Ġimgħa quddiem il-Maġistrat Donatella Frendo Dimech.
Busuioc jinsab mixli li b’mod volontarju x-xahar li għadda ta n-nar f’kumpless ta’ garaxxijiet u qered minn tal-inqas żewġ vetturi.
Fis-seduta tal-lum, xehdu żewġ uffiċjali tal-pulizija li kienu l-ewwel fuq il-post tan-nirien fi Triq Ġuże’ Howard f’Tas-Sliema. Ir-residenti fil-blokka ta’ appartamenti li hemm fuq il-kumpless ta’ garaxxijiet kellhom jiġu evakwati. Il-ħaddiema tad-Dipartiment tal-Protezzjoni Ċivili mbagħad spezzjonaw il-bini qabel kien iddikjarat sigur u ħallew lir-residenti jidħlu lura fl-appartamenti.
Xehed ukoll l-ispettur tal-Pulizija Mario Xiberras li qed imexxi l-prosekuzzjoni f’isem id-Dipartiment tal-Investigazzjonijiet Kriminali, li qal lill-Qorti kif uffiċjali kienu ssejħu għal rapport ta’ nirien fil-kumpless ta’ garaxxijiet ta’ erba’ sulari. Qal li l-Maġistrat Nadine Lia kienet qed tagħmel inkjesta dwar in-nirien u kienet ħatret diversi esperti biex jassistu.
Filmati tas-CCTV rkuprati bħala parti mill-investigazzjoni, urew li ma kienx sempliċi nar iżda xi ħadd kien qabbdu. “Il-filmati wrew persuna dieħel fil-kumpless, tidħol f’diversi garaxxijiet u fil-karozzi. Waħda mill-oġġetti misruqa minn waħda minn dawk il-karozzi aktar tard instabet fir-residenza tal-akkużat,” qal l-ispettur.
Ġiet irkuprata wkoll marka tal-idejn minn tieqa tal-karozza miksura.
Il-filmati wrew lill-istess raġel ħiereġ minn garaxx ieħor, segwit minn nar qawwi.
Aktar tard l-uffiċjali kienu lemħu persuna li taqbel mad-deskrizzjoni ta’ Busioc, mit-tattoos li kellu fuq idu, u sussegwentement kien arrestat.
Il-Pulizija għamlet tfittxija fil-kamra ta’ Busioc fil-lukanda f’Tas-Sliema fejn kien joqgħod.
Fil-kamra tal-lukanda tiegħu nstabet tracksuit u papoċċ simili għal dak li kien liebes l-allegat persuna li tat in-nar fil-kumpless u torċ misruq.
Waqt l-interrogazzjoni tal-pulizija, Busuioc kien għaraf lilu nnifsu fil-filmati, u qal lill-investigaturi li ma kienx jaf għaliex għamel dak li għamel, qal Xiberras. Żied li l-filmati wrew lil Busuioc bħala l-unika persuna ġewwa l-kumpless tal-garaxx fis-siegħa ta’ qabel beda n-nar.
Il-każ ikompli.
