Wara li llejla fil-Parlament ittieħdu tliet voti importanti fosthom dik tar-riformi fl-inkjesti, il-Prim Ministru Robert Abela f’kumment li tella’ fuq il-midja soċjali qal li l-voti li ttieħdu fil-Parlament “li fihom bħala Gvern ivvutajna favur l-implimentazzjoni tal-miżuri tal-Budget biex inkomplu nwettqu aktar ġid għall-familji tagħna.”
Kompla jikteb li l-Grupp Parlamentari Laburisti vvota wkoll b’solidarjetà mal-Ispeaker. “L-Oppożizzjoni ma kinitx kapaċi terfa’ lilha nnifisha mill-estremiżmu li ħakimha u tivvota favur id-demokrazija u r-rispett lejn l-ogħla istituzzjoni tal-pajjiż,” kiteb Dr Abela.
“Għaddejna wkoll il-liġi li taqta’ l-abbuż mill-ġustizzja. Għedna li mhu se nħallu lil ħadd isallab lin-nies għalxejn b’xejn u hekk għamilna. Ridna wkoll nagħtu drittijiet ġodda lill-vittmi li jitħallew żmien twil fl-għama. Dan għalina ma kienx aċċettabbli u għalhekk illejla illeġislajna wkoll favurihom.”
Il-Prim Ministru temm il-messaġġ tiegħu billi qal li “ħaddieħor ħsiebu biex ixerred il-gideb. Dan mhu se jwaqqafna qatt milli nkomplu nġibu bidliet favur in-nies u dak li hu sewwa.”
