INTER ……………4
BARCELONA ……3
(wara l-ħin barrani)
(Agg: Inter 7-6)
Fit-tieni leg tas-semi-finali tal-UEFA Champions League, li kien wieħed spettakolari, Inter għelbu lil Barcelona bl-iskor ta’ 4-3 fil-ħin barrani biex saru l-ewwel finalisti hekk kif għaddew b’aggregate ta’ 7-6.
Kienu Inter li fetħu l-iskor, fil-21 minuta, meta Dumfries ħarab in-nasba tal-offside, avvanza u ppreżenta l-ballun lil Lautaro Martinez li bil-kalma kollha xeħet il-ballun fix-xibka.
Fis-36 minuta, Lamine Yamal seraq ballun, daħal fil-kaxxa iżda minn pożizzjoni angolata x-xutt tiegħu għadda jħakkek ma’ sieq il-lasta.
Iżda fl-45 minuta, Hakan Calhanoglu rdoppja għal Inter minn penalty wara li Lautaro Martinez ġie ffawljat minn Inigo Martinez fil-kaxxa.
Iżda fit-tieni taqsima, il-Katalani kienu team trasformati meta fl-54 minuta, naqqsu l-marġni tal-iskor meta Eric Garcia kkonnettja mill-cross ta’ Gerard Martin u b’xutt angolat xeħet fir- rokna tas-saqaf tax-xibka.
Żewġ minuti wara, il- goalkeeper Interista, Yann Sommer, wettaq save kbir fuq Eric Garcia biex evita goal ċert.
Madankollu, fit-60 minuta, Barca kisbu d-draw minn daqqa ta’ ras ta’ Dani Olmo … u tliet minuti mit-tmiem Raphinha ħaseb li skorja l-goal tar-rebħ għal Barcelona. Aktar minn hekk Yamal seta’ għalaq il-partita iżda ġie mċaħħad mil-lasta.
Peró, fit-93 minuta, Francesco Acerbi kiseb id-draw għal Inter biex kien jeħtieġ jintlagħab il-ħin barrani.
U proprju fid-99 minuta, Davide Frattesi skorja dak li kellu jkun il-goal tar-rebħa għal Inter b’xutt djagonali li spiċċa fir-rokna tax-xibka.
Fil-110 minuta, Wojciech Szczesny kien providenzjali għal Barca meta wettaq save kbir fuq kanunata ta’ Frattesi.
