Fil-Berġa ta’ Kastilja, il-Prim Ministru Robert Abela kellu laqgħa ma’ Glenn Micallef, il-Kummissarju Ewropew nominat minn Malta. Il-prim ministru feraħ lil Micallef għall-prestazzjoni eċċellenti tiegħu waqt il-grilling li sar quddiem Kumitat fi ħdan il-Parlament Ewropew. Dr Abela nnota b’sodisfazzjon li Micallef qed jiġi fdat b’portafoll importanti u kruċjali għall-preżent u l-ġejjieni tal-Unjoni Ewopea.
Fil-laqgħa, il-Prim Ministru Robert Abela fisser kif in-nominat Malti, li għandu l-Portafoll taż-Żgħażagħ, il-Ġustizzja Interġenerazzjonali, l-Isport u l-Kultura għandu quddiemu ħidma importanti li taħdem id f’id ma’ dik tal-Gvern Malti, li dejjem imbotta fuq temi marbuta ma’ riformi li taw aktar vuċi partikolarment liż-żgħażagħ. Il-prim ministru qal li pajjiżna jrid jibqa’ jara liż-żgħażagħ bħala l-mutur li jimbuttaw bidliet kontra l-istatus quo u favur it-titjib fil-kwalità ta’ aspetti differenti fil-ħajja tan-nies. Żied jgħid li l-ġustizzja bejn il-ġenerazzjonijiet flimkien mal-isport u l-kultura huma temi oħra importanti li l-gvern qed jaħdem fuqhom anki fil-Budget li ressaq biex pajjiżna jimxi għal-livell li jmiss, il-kwalità.
Glenn Micallef spjega kif se jkun qed jiltaqa’ ma’ diversi żgħażagħ mill-Istati Membri kollha, bil-Prim Ministru Robert Abela jistieden lil Micallef biex f’pajjiżna jindirizza laqgħa tal-Youth Advisory Forum fil-kuntest li pajjiżna huwa wieħed mill-Istati Membri b’forum tat-tip tiegħu. Dr Abela qal li pajjiżna qed ikompli juri bil-fatti li jemmen fiż-żgħażagħ li għandhom il-ħila u r-rieda li jressqu ’l quddiem ideat u jaħdmu favur il-ġid il-komuni. Il-Prim Ministru awgura kull suċċess lil Glenn Micallef fil-ħidma futura tiegħu b’risq Malta u l-Unjoni Ewropea.
