Il-Ministru għas-Saħħa u l-Anzjanità Attiva Jo Etienne Abela ħabbar pass importanti ‘l quddiem fil-kura kardijaka għall-pazjenti Għawdxin u Maltin bl-introduzzjoni tas-servizzi ġodda ta’ Cardiac CT u Cardiac MRI fl-Isptar Ġenerali t’Għawdex.
Il-Ministru Jo Etienne Abela qal kif wara l-akkwist riċenti ta’ żewġ scanners bl-aħħar teknoloġija tal-MRI u CT Scan, l-Isptar Ġenerali t’Għawdex issa jista’ joffri testijiet tal-qalb dettaljati u mhux invażivi, li jippermettu djanjosi aktar bikrija u preċiża.
Huwa spjega kif l-introduzzjoni tal-Cardiac CT tippermetti detezzjoni rapida ta’ mard tal-arterji tal-qalb f’pazjenti b’riskju baxx u intermedju kif ukoll viswalizzazzjoni preċiża tal-valves tal-qalb u tal-aorta f’ċertu pazjenti. Filwaqt li l-introduzzjoni tal-Cardiac MRI toffri eżamijiet fil-fond tal-funzjoni tal-qalb kif ukoll tal-infjammazzjoni tal-qalb, scarring tal-muskulatura tal-qalb kif ukoll il-valutazzjoni tal-valves tal-qalb.
Intqal kif grazzi għall-kollaborazzjoni tad-Dipartiment tal-Medical Imaging f’Malta u Għawdex imexxi minn Dr Melvin D’Anastasi, u tad-Dipartiment tal-Kardjoloġija, dan is-servizz ser jippermetti djanjosi effiċjenti u trattament avvanzat tal-mard tal-qalb, inaqqas il-bżonn li l-pazjenti jivvjaġġaw lejn Malta għas-servizzi speċjalizzati, filwaqt li jenfasizza wkoll l-impenn tal-gvern li jiżviluppa s-servizzi tas-saħħa u jtejjeb ir-riżultati għall-pazjenti Għawdxin u Maltin.
“Grazzi għall-investiment ta’ madwar €5 miljun fl-aħħar xhur fl-Isptar t’Għawdex, mhux biss rajna li titneħħa il-lista ta’ stennija għal testijiet ta’ MRI u CT Scans kompletament, imma wkoll kien possibbli biex issa nibdew noffru dawn is-servizzi f’Għawdex stess. Bħala Gvern kommessi li nkomplu inkabbru u nintroduċu aktar servizzi biex ngħinu aktar pazjenti Maltin u Għawdxin,” temm jgħid il-ministru.
