Raġel armat, li huwa maħsub li kien influwenzat mill-ideoloġija tal-lemin estrem, qatel sitt persuni u weġġa’ għadd ta’ persuni oħra f’attakk f’Krakovja, il-Polonja.
Il-Pulizija Pollakka qalet li l-aggressur saq lejn il-pjazza tas-suq prinċipali s-Sibt waranofsinhar u beda jispara bl-addoċċ lejn in-nies.
F’dan l-attakk inqatlu erba’ nisa u żewġt irġiel. Tlieta minnhom kienu Pollakki, persuna oħra kienet ta’ nazzjonalità Brittanika, filwaqt li l-identità taż-żewġ persuni l-oħra għadha ma ġietx stabbilita.
Fost is-16-il persuna midruba hemm ħames ċittadini barranin mill-Awstrija, il-Ġermanja, il-Portugall, ir-Russja u r-Renju Unit.
Il-Prim Ministru tal-Polonja Donald Tusk żvela li l-pulizija mill-Iskwadra ta’ Kontra t-Terroriżmu kienu sabu l-katavri ta’ tliet persuni oħra fid-dar tas-suspettat, li kienet tinsab madwar 125 mil bogħod minn fejn seħħ l-attakk.
Tard is-Sibt filgħaxija, madwar Krakovja kien hemm preżenza qawwija ta’ pulizija armata, filwaqt li l-miżuri tas-sigurtà ġew imsaħħa fil-kapitali Varsavja u f’postijiet oħra.
Fi Krakovja ġie ddikjarat perjodu ta’ luttu li se jibqa’ għaddej sa nhar l-Erbgħa li ġej.
Fost il-persuni midruba hemm ukoll żewġ uffiċjali tal-pulizija, li wieħed minnhom jinsab f’qagħda kritika.
