Minn Cristian Muscat
Emozzjoni kbira ħakmet lill-kamp ta’ Mosta FC hekk kif it-tim salva postu fil-Malta Premier wara rebħa importanti ta’ 1-0 kontra Naxxar Lions F.C. fil-YoHealth Malta Premier Relegation Play-Offs li ntlagħbet fi tmiem il-ġimgħa li għaddiet fl-Istadium Nazzjonali f’Ta’ Qali.
Kienet logħba ta’ pressjoni enormi għaż-żewġ naħat, iżda Mosta rnexxielhom jżommu l-kalma u jieħdu dak ir-riżultat li kien tant meħtieġ biex jiżguraw posthom fl-ogħla diviżjoni tal-futbol Malti. Wara s-suffara finali, il-kowċ Joseph Grech ma felaħx iżomm lura l-emozzjonijiet tiegħu u tkellem ma’ dan is-sit elettroniku dwar xi tfisser għalih din il-salvazzjoni fil-Premier.
“Iva, irnexxielna nagħmluha,” qal Grech b’ton emozzjonat. “Kien staġun diffiċli immens, staġun ta’ tlugħ u nżul. Kien rollercoaster kif jgħidu bl-Ingliż. Kien hemm logħbiet fejn lgħabna tajjeb ħafna iżda r-riżultati ma kinux qed jiġu.”
Il-kowċ Mosti spjega kif it-tim tiegħu kellu jaffaċċja diversi mumenti diffiċli matul l-istaġun kollu, iżda l-fatt li l-iskwadra baqgħet magħquda kien kruċjali biex finalment waslu għas-salvazzjoni.
“Il-plejers ħadmu ħafna. Anke meta l-affarijiet ma kinux sejrin kif xtaqna, qatt ma waqfu jemmnu. Bqajna naħdmu u nemmnu sa l-aħħar.”
Il-partita kienet deċiża minn gowl importanti fit-23 minuta meta, wara assist ta’ Nevin Portelli, Azer Kozic għeleb lill-goalkeeper ta’ Naxxar Lions Matthias Debono. Dak il-gowl kien biżżejjed biex jagħti lil Mosta rebħa prezzjuża ħafna.
Madankollu, il-logħba ma kinitx waħda faċli. Naxxar Lions ippruvaw jirreaġixxu, iżda Mosta ddefendew tajjeb u rnexxielhom jżommu l-vantaġġ sat-tmiem. It-tkeċċija ta’ Gustavo Felipe fit-75 minuta kompliet tagħmilha aktar diffiċli għal Naxxar, filwaqt li lejn it-tmiem Giancarlo Goncalves kien viċin jiskorja t-tieni gowl għal Mosta iżda x-xutt tiegħu ħabat mal-lasta.
Meta mistoqsi dwar l-emozzjonijiet tiegħu wara s-suffara finali, Grech ammetta li dan kien wieħed mill-aktar mumenti intensivi fil-karriera tiegħu.
“Kont emozzjonat ħafna. Anke bkejt,” stqarr. “Meta tara x’għadda minnu t-tim tul is-sena kollha, l-emozzjoni tiġi waħedha. Dan kien frott ta’ staġun iebes immens.”
Grech saħaq ukoll fuq l-importanza tal-appoġġ li t-tim irċieva mill-partitarji Mostin.
“Il-partitarji tagħna kienu magħna. Anke meta konna għaddejjin minn perjodi diffiċli, huma komplew jappoġġjaw lit-tim. Dan jagħmel differenza kbira għalina.”
Il-kowċ ta’ Mosta tkellem ukoll dwar il-fatt li din il-logħba kellha piż psikoloġiku qawwi, speċjalment minħabba li kienet kontra rivali sportivi.
“Kienet sitwazzjoni diffiċli għax dawn huma rivali sportivi tagħna u f’dawn il-logħbiet trid tkun preparat sew mentalment. Imma dak hu l-futbol. Aħna ppreparajna sew f’dawn l-aħħar 15-il ġurnata u l-plejers daħlu fil-grawnd b’mentalità tajba.”
“F’dawn il-mumenti tara tassew minn xiex ikun magħmul tim,” kompla jgħid Grech. “Ma kienx faċli li niffukaw meta konna nafu li din kienet se tkun logħba ta’ ħajja u mewt. Il-pressjoni kienet enormi, iżda l-esperjenza ta’ xi plejers u l-entużjażmu taż-żgħażagħ għenu biex jinħoloq bilanċ importanti fil-grupp. Tul dawn l-aħħar ġimgħat tkellimna ħafna bejnietna u ppruvajna nibqgħu pożittivi. Kull sessjoni ta’ taħriġ kienet importanti u kulħadd ta sehem tiegħu. Nemmen li r-rebħa waslet għax dan il-grupp baqa’ magħqud u ffukat sal-aħħar minuta.”
Fil-fatt, wieħed seta’ jinnota kemm Mosta deher organizzat tattikament u kemm il-plejers kienu dixxiplinati matul il-konfront kollu. Dan huwa aspett li ħafna jqabbluh mal-istil ta’ tmexxija ta’ Joseph Grech, kowċ magħruf għall-adattabilità tattika tiegħu u għall-ħila li joħroġ l-aħjar mill-plejers tiegħu.
Grech, li għandu UEFA Pro Licence, ilu snin twal involut fil-futbol Malti u bena reputazzjoni soda bħala wieħed mill-aktar kowċis preparati fil-kampjonat Malti. Huwa ngħaqad ma’ Mosta bħala kowċ ewlieni f’Ġunju tal-2021, fejn ħa post Davor Filipovic.
Minn dakinhar ’l hawn, huwa bena relazzjoni professjonali b’saħħitha mad-Direttur Tekniku Mario Muscat, b’ħafna jqisu din is-sħubija bħala wieħed mill-fatturi ewlenin tal-istabbiltà ta’ Mosta fl-ogħla livell.
Tul il-karriera tiegħu, Grech kiseb esperjenza vasta ma’ diversi klabbs Maltin fosthom Floriana F.C., Msida St. Joseph F.C., Gozo F.C., Marsa F.C. u Pembroke Athleta F.C.. Huwa serva wkoll bħala assistant coach ma’ Balzan u Mosta taħt Mark Miller, kif ukoll mexxa lit-tim nazzjonali Malti ta’ taħt is-17-il sena.
F’Marzu tal-2025, Grech kien saħansitra ġie vvutat bħala l-VBET Coach of the Month wara sensiela impressjonanti ta’ riżultati pożittivi ma’ Mosta fil-Premier League.
Minkejja d-diffikultajiet ta’ dan l-istaġun, il-kowċ Mosti dejjem baqa’ jemmen fil-potenzjal tal-iskwadra tiegħu. U issa li s-salvazzjoni ġiet assigurata, jidher li l-futur tiegħu ma’ Mosta se jkompli.
“Minn dak li naf bħalissa, suppost se nibqa’ ma’ Mosta sena oħra,” qal Grech. “Għandi kuntratt mal-klabb għalkemm bħalissa rrid nieħu ftit tan-nifs wara dan l-istaġun diffiċli.”
Issa Mosta jistgħu jħarsu ’l quddiem lejn staġun ieħor fil-Malta Premier b’aktar serenità, filwaqt li Joseph Grech jista’ jħares lura lejn wieħed mill-aktar kapitli emozzjonanti fil-karriera tiegħu.
Fl-aħħar mill-aħħar, din ma kinitx biss rebħa ta’ partita. Kienet rebħa tal-karattru, tal-għaqda u tal-fidi li l-plejers u diriġenti ta’ Mosta qatt ma tilfu.