L-attakkant ta’ Inter Miami Lionel Messi ispira lill-Arġentina għall-finali tal-Copa America b’rebħa ta’ 2-0 fuq il-Kanada.
Il-player ta’ 37 sena skorja sitt minuti mill-ftuħ tat-tieni taqsima biex irdoppja għall-Albiceleste meta kompla għal ġewwa tentattiv ta’ Enzo Fernandez.
Kien l-attakkant ta’ Manchester City, Julian Alvarez, li fit-22 minuta, fetaħ l-iskor għall-holders meta kkonnettja l-pass ta’ Rodrigo de Paul, avvanza u xeħet fix-xibka … biex issa jimmiraw li jirbħu din il-kompetizzjoni għas-16-il darba.
Il-finali se tkun l-aħħar dehra ta’ Angel di Maria għall-Arġentina qabel jirtira mit-team nazzjonali u hemm dubji wkoll dwar il-futur ta’ Messi.
“Ejja ngawdu dak li qed nesperjenzaw bħala team nazzjonali, bħala grupp. Mhux faċli li terġa’ tkun f’finali, li terġa’ tikkompeti biex tkun champions,” qal Messi.
Perżo, il-Kanadiżi, li qed jieħdu sehem għall-ewwel darba f’din il-kompetizzjoni setgħu fetħu l-iskor, wara kwarta logħob, meta Jacob Shaffelburg tela’ waħdu iżda falla ċans tad-deheb.
Imbagħad, fil-ħin miżjud tal-ewwel taqsima, Jonathan David naqas li jikseb id-draw meta minn qagħda ideali xxuttja ċentrali.
