L-eks Duka ta’ York, Andrew Mountbatten-Windsor, żvela fil-qorti li f’Mejju li għadda huwa sab ruħu wiċċ imb’wiċċ ma’ raġel suspettat li kien qed isegwih b’mod persistenti qrib ir-residenza tiegħu f’Norfolk. Waqt dan kollu, ir-raġel kien liebes maskra li tgħatti l-wiċċ kollu.
Ir-raġel suspettat, Alex Jenkinson ta’ 39 sena, ġie akkużat li uża kliem jew imġieba ta theddida, abbużiva jew insulenti fil-konfront tal-eks prinċep Andrew waqt inċident li seħħ fis-6 ta’ Mejju f’Norfolk.
Fi stqarrija li nqrat fis-seduta tal-Qorti tal-Maġistrati ta’ Westminster, l-eks Duka ta’ York spjega kif seħħew l-avvenimenti waqt li kien qed imexxi il-klieb tiegħu fil-proprjetà tiegħu.
Il-Pulizija ta’ Suffolk qed titlob ukoll għal Ordni Ċvili ta’ Protezzjoni kontra l-Istalking fil-konfront ta’ Jenkinson, abbażi ta’ provi pprovduti minn Andrew u informazzjoni misjuba waqt it-tfittxija fil-mowbajl ta’ Jenkinson.
Oriġinarjament, Jenkinson li joqgħod fi Stowmarket f’Suffolk, qed joġġezzjona għal din l-ordni relatata mal-istalking.
Wara dan l-inċident, Jenkinson inżamm taħt osservazzjoni skont l-Att dwar is-Saħħa Mentali għal madwar xahar. Huwa wieġeb ħati tal-akkuża li naqas milli jipprovdi kampjun tad-demm waqt li kien taħt arrest fis-6 ta’ Mejju.
Madankollu, huwa qed jiċħad l-akkuża relatata mal-ordni pubbliku li tinvolvi lil Andrew Mountbatten-Windsor, u wieġeb ukoll mhux ħati għal akkuża oħra li fiha huwa mixli li uża kliem jew imġieba ta theddida, abbużiva jew insulenti bl-intenzjoni li jikkaġuna biża’ jew jipprovoka vjolenza illegali kontra raġel ieħor, f’King’s Lynn fil-5 ta’ Mejju.
Huwa mistenni li Andrew jixhed permezz ta’ vidjokonferenza waqt il-proċess kriminali, li ġie skedat għall-21 ta’ Diċembru 2026.
Jenkinson jinsab meħlus mill-arrest fuq pleġġ b’rabta ma’ dan il-każ kriminali, u l-kundizzjonijiet imposti fuqu jinkludu projbizzjoni milli jersaq qrib postijiet assoċjati mal-familja rjali, bħal Sandringham, Buckingham Palace, Balmoral, Windsor u Highgrove.
