Malta Premier: Birkirkara u Marsaxokk fl-aqwa partita

Illum u għada tintlagħab id-disa’ ġurnata tal-Clo­s­ing Round tal-Malta Premier League, jew aħjar il-25 waħda tal-istaġun. 

Hekk kif fadal tliet ġra­net oħra qed tintensifika l-isfida biex ikun komplet il-kwadru tat-Top Six u dawk it-timijiet li jkol­lhom jikkuntentaw li ji­lagħbu fil-Bottom Six.

Dan il-programm huwa mill-aktar interessanti bl- aktar partita li tispikka tkun dik bejn Birkirkara u Marsaxlokk li jinsabu jokkupaw il-quċċata tal-klassifika flimkien ma’ Floriana li jittamaw li dawn it-tnejn itemmu fi draw filwaqt li  huma joħorġu rebbieħa kontra Gzira United.

Birkirkara v Marsa­xlokk – Bla dubju, dan huwa l-aqwa konfront ta’ tmiem il-ġimgħa fejn ħadd ma jaffordja jitlef fit-tentattiv li jżommu l-kuntatt mat-timi­jiet ta’ fuq, l-aktar Marsa­xlokk li fl-Ewwel Fażi lagħbu fil-Bottom Six.

Iż-żewġ timijiet ġejjin minn żewġ rebħiet konsekuttivi li fihom ma sofrew l-ebda goal. 

Barra minn hekk, Birkirkara bbukkjaw post fis- semi-finali tal-FA Trophy hekk kif nhar l-Erbgħa għelbu lil Valletta bl-iskor ta’ 3-1 liema partita marret fil-ħin barrani biex huma wkoll lagħbu nofs siegħa aktar … u forsi ma jilħqux jirkupraw tajjeb fiżikament kontra t-team frisk ta’ Mar­saxlokk. 

Mandankollu, dan huwa konfront bilanċjat u miftuħ għal kull riżultat.

U filwaqt li l-Karkariżi se jkunu bl-aqwa formazzjoni Marsaxlokk għandhom lil Duvan Torres Quino­nes sospiż iżda jilqgħu lil Lucas Lopez Dessypris minn sospensjoni.

Fil-partita preċedenti, Bir­kirkara kienu ħarġu rebbieħa bl-iskor ta’ 2-0. 

Gzira U. v Floriana – Friski mir-rebħa ta’ 1-0 fuq Hamrun Spartans, Gzira United jiltaqgħu kontra Floriana u jimmiraw li jirrepetu dan is-suċċess.

Min-naħa l-oħra, Floria­na jridu jinsew id-diżappunt ta’ draw 2-2 kontra Mosta fejn fallew żewġ punti importanti fl-isfida tagħhom li f’dan il-Closing Round iridu jispiċċaw fl-ewwel post biex jiġu nkurunati cham­pions wara li temmew l-ewwel fl-Opening Round.

Floriana għadhom kif ikkwalifikaw għas-semi-finali tal-FA Trophy meta għelbu lil Mosta bl-iskor ta’ 2-0 u għalhekk jinżlu b’moral għoli. 

Min-naħa tagħhom, il- Maroons għandhom bżonn il-punti hekk kif jinsabu fis-sitt post u jistgħu jin­qab­żu faċilment minn erba’ timijiet oħra. 

Floriana ma jistgħux jinkludu lis-sospiżi, Oualid El Hasni u lill-goalkeeper, Yan-Alexander Yann, filwaqt li Gzira mistennija jinżlu bl-aqwa formazzjoni possibbli.

Fil-partita preċedenti, Floriana għelbu lil Gzira bl-iskor ta’ 2-1.

Hamrun S. v Mosta – Hamrun Spartans jaffrontaw lil Mosta wara li fi tmiem il-ġimgħa li għadda sfaw megħluba minn Gzira Uni­ted bl-iskor ta’ 1-0.

Fil-veritá, l-Ispartans hu­ma biss id-dell tal-istaġun li għadda minħabba li qed jonqsu milli jikkonvinċu.

Minn tmien partiti f’din it-tieni fażi, ir-rekord tagħ­hom huwa ta’ erba’ rebħiet, żewġ draws u żewġ telfiet. 

Peró, huma kkwalifikaw għas-semi-finali tal-FA Trophy meta għelbu lil Sliema Wanderers bl-iskor ta’ 2-0 f’rebħa meritata. 

Huma jistennew partita diffiċli kontra Mosta hekk kif jimmiraw li jerġgħu jilagħbu fit-Top Six.

L-Ispartans għandhom lil Elionay Freitas Da Silva sospiż għat-tieni darba dan l-istaġun filwaqt li Sasha Cachia jirritorna minn sospensjoni għall-Mostin. 

Fiż-żewġ konfronti pre­ċedenti, kienu l-Mostin li ħarġu rebbieħa bl-iskor ta’ 1-0 u 2-1. 

Balzan v Sliema W. – Il-pressjoni tinsab kollha fuq Sliema Wanderers hekk kif ġejjin minn tliet telfiet konsekuttivi, sfaw elimi­nati mill-FA Trophy … u jinsabu fid-disa’ post b’ċans tajjeb li ma jikkwalifikawx mat-Top Six.

Huma fadlilhom tliet part­iti biex isalvaw post­hom mal-aqwa sitt timijiet u għaldaqstant huwa mpe­rattiv li jiksbu tliet reb­ħiet minħabba li hemm erba’ timi­jiet oħra biċ-ċans li jevitaw il-Bottom Six. 

Balzan jinsabu punt taħt­hom u rebħa tarahom jaqbżu lill-istess Wanderers. Min-naħa l-oħra, b’telfa jkunu prattikament destinati li jilagħbu fil-Bottom Six.

Kull team għandu player sospiż  – Nicholas Pulis għal Balzan u Geoffrey Acheampong għal Sliema iżda għalihom jirritorna Murilo minn sospensjoni.  

Fil-logħba diretta, Sliema għelbu lil Balzan 2-0.

Melita v Zabbar SP – Me­lita u Zabbar St Patrick jaffrontaw lil xulxin f’dak li huwa konfront dirett. 

Iż-Żabbarin għandhom tliet players sospiżi – Kristian Keqi, David Oliveira Souza u Diogo Tavares, filwaqt li Marc Van De Font Bovenkamp huwa sospiż għal Melita. 

Fiż-żewġ konfronti diretti kull team rebaħ logħba – Melita 3-1 u Zabbar 1-0.  

Hibernians v Naxxar L. – F’temp ta’ tlett ijiem, Hibernians u Naxxar Lions jerġgħu jiltaqgħu wara li nhar il-Ħamis, il-Pawlis­ti għelbu lil Naxxar 2-0 fil- kwarti-finali tal-FA Trophy. 

Hibernians għandhom lil Alfred Hamanjoda Silas u lil Pedro Henrique Nunes Silva sospiżi filwaqt li Ya­suke Ito huwa sospiż għal Naxxar. 

Fil-logħba preċedenti, Hi­­bernians rebħu lil Nax­xar bl-iskor ta’ 2-1. 

– Cristian Muscat