Wednesday, April 17, 2024

MFA: Imqassma l-pagamenti ta’ solidarjetà tal-UEFA lin-nurseries

Aqra wkoll

Il-pagamenti ta’ solidarjetà tal-UEFA tqassmu lin-nurseries. Il-Malta FA Training Grounds kienu qed mimlija attività dalgħodu hekk kif ‘il fuq minn 320 tifel u tifla ħatfu l-opportunità jilagħbu fil-grawnds tat-turf naturali f’Ta’ Qali.

L-enfasi kollha kienet fuq il-futbol tal-grasroots hekk kif il-Malta Football Association, il-Fondazzjoni Inhobb il-Futbol (IFF), u l-Youth Football Association ingħaqdu biex jorganizzaw il-festival annwali ta’ taħt is-seba’ snin.

B’kollox 33 nurseries ħadu sehem fl-avveniment ta’ din is-sena li wera l-ħidma intensiva tagħhom u r-rwol fundamentali tagħhom fl-eko-sistema tal-futbol.

Bħal fl-aħħar snin, il-pagamenti annwali ta’ solidarjetà tal-UEFA tqassmu lin-nurseries lokali taż-żgħażagħ waqt din l-attività.

Bjorn Vassallo, il-president tal-Malta FA, ingħaqad ma’ Fr Hilary Tagliaferro, President Onorarju u Fundatur tal-Youth FA, hekk kif iż-żgħażagħ għożżew il-grawnds, u bil-passjoni u l-entużjażmu tagħhom taw kontribut għall-atmosfera vivaċi.

“Dawn l-avvenimenti jenfasizzaw l-importanza li ninvestu fil-mogħdija taż-żgħażagħ li hija essenzjali għat-tfal tagħna biex jiżviluppaw b’mod għaqli fil-karattru b’mod parallel mal-edukazzjoni u t-tkabbir tagħhom fil-futbol,” qal is-Sur Vassallo.

“Il-Malta FA, flimkien mal-Fondazzjoni Inhobb il-Futbol u l-Youth FA, jibqgħu impenjati bis-sħiħ li jinvestu fl-infrastruttura u l-programmi ta’ żvilupp tat-talent biex jissaħħaħ is-settur tal-grasroots.”

Filwaqt li rringrazzja lill-president tal-Malta FA għall-impenn tiegħu u tal-Assoċjazzjoni li jsostni l-investimenti fil-grasroots, Fr Hilary qal: “Din l-okkażjoni annwali tfakkarni fl-isbaħ jiem ta’ ħajti bħala tifel żgħir li kien iħobb nilgħab il-futbol.

“Il-futbol tani kollox u nixtieq li dawn it-tfal kollha jesperjenzaw dan il-ferħ permezz tal-passjoni tagħhom għal-logħba. L-appell tiegħi lill-ġenituri huwa biex joqogħdu lura milli jagħmlu pressjoni fuq uliedhom, il-futbol huwa dwar divertiment allura ħallihom jieħdu gost.”

It-tfal ħaddnu din l-esperjenza hekk kif ħadu sehem f’diversi logħbiet u mpenjaw ruħhom ma’ sħabhom dilettanti tal-futbol minn nurseries oħra, u gawdew ukoll togħma tal-logħob fil-grawnds famużi li jospitaw regolarment is-sessjonijiet ta’ taħriġ tal-selezzjonijiet nazzjonali tagħna tal-futbol. Kowċis mill-IFF, flimkien ma’ membri tal-istaff tal-Youth FA u taċ-Ċentru Tekniku segwew il-proċeduri.

Ekonomija

Sport