Is-sewwieq Spanjol tal-MotoGP, Alex Marquez, ġie operat b’suċċess f’Madrid, fejn tneħħewlu l-plates minn spalltu tal-lemin u minn idu x-xellugija, kif ukoll ċesta żgħira minn spalltu biex titnaqqas il-pressjoni bejn l-għeruq u l-ġogi.
Il-pilota tat-team Gresini ma kellu l-ebda kumplikazzjoni waqt l-intervent u issa beda l-perjodu ta’ rkupru f’pajjiżu.
Marquez mhux se jieħu sehem fil-Grand Prix tal-Qatar fi tmiem din il-ġimgħa, iżda mistenni jirritorna fuq id-Ducati tiegħu fil-Grand Prix tal-Portugall f’Portimao.
L-Ispanjol irringrazzja lit-tim mediku, immexxi mit-tabib Samuel Antuna, kif ukoll lil dawk kollha li tawh l-appoġġ tagħhom matul dan il-perjodu diffiċli.
