Minn Cristian Muscat
Bejn illum u nhar il-Ħadd li ġej tintlagħab it-tieni ġurnata tat-Tieni Fażi jew aħjar it-18-il ġurnata tal-Malta Premier League.
Bla dubju, l-aktar partita li tispikka hija dik bejn Hibernians u Hamrun Spartans, żewġ timijiet li ddiżapuntaw fl-Ewwel Fażi, li iżda jridu jtemmu fl-ewwel żewġ positijiet ta’ din il-fażi biex jikkwalifikaw għas-semi-finali għar-rebħ tat-titlu.
Floriana, li rebħu l-Ewwel Fażi, jibdew favoriti li jiksbu t-tliet punti kontra Melita filwaqt li Birkirkara għandhom partita delikata kontra Gzira United.
Sliema Wanderers, li ġejjin minn telfa kontra Zabbar St Patrick, jiffaċċjaw lil Naxxar Lions filwaqt li l-istess Żabbarin jilagħbu kontra Marsaxlokk.
Il-partita li tiftaħ dan il-programm hija dik bejn Balzan u Mosta li hija miftuħa għal kull riżultat.
Hibernians v Hamrun S. – B’team trasformat għal kollox minn dak tal-Ewwel Fażi, Hamrun Spartans jiltaqgħu ma’ Hibernians, biż-żewġ timijiet għandhom joffru konfront mill-aktar interessanti.
Proprju fl-aħħar ħarġa tagħhom, l-Ispartans taw twissija lill-avversarji tagħhom hekk kif għelbu lil Marsaxlokk bl-iskor kbir ta’ 6-1 minkejja li kienu dawn tal-aħħar li marru fil- vantaġġ.
Min-naħa tagħhom, Hibernians iridu jkunu fl-aqwa forma possibbli biex iwarrbu l-isfida tal-Ħamruniżi hekk kif kellhom jitħabtu biex għelbu lil Melita bl-iskor ta’ 3-2.
Filwaqt li l-Ispartans se jkunu bl-aqwa formazzjoni possibbli, Hibernians għandhom lil Kurt Shaw sospiż. Iżda huma jkunu msaħħa bir-ritorn minn sospensjoni taż-żewġ Brażiljani, Higor Gabriel Fernandes Alves u Miullen Natha Felicio Carvalho.
Fl-Ewwel Fażi, iż-żewġ timijiet irreġistraw rebħa kontra xulxin – Hibernians bl-iskor ta’ 2-0 u Hamrun bl-iskor ta’ 3-0.
Floriana v Melita – Floriana jiffaċċjaw lil Melita u jibdew favoriti li jiksbu t-tliet punti iżda huma jridu juru rispett lejn l-avversarji minħabba li fl-aħħar partita huma għamlu l-ħajja tal-Pawlisti verament diffiċli.
Il-Furjaniżi ġejjin minn rebħa komda ta’ 4-0 fuq Naxxar Lions bi Franklin Sasere jiskorja doppjetta biex irreġistra l-10 goal staġjonali bil-flokk aħdar.
L-aħħar rebħa ta’ Melita fl-ogħla diviżjoni fuq Floriana tmur lura għall-4 ta’ Diċembru, 1946, bl-iskor ta’ 4-1.
Iż-żewġ timijiet għandhom player sospiż – il-goalkeeper Christoffer Mafoumbi għal Floriana u Jean Pierre Attard għal Melita … u player kull wieħed li jirritorna minn sospensjoni – Alexandros Kouro (Floriana) u Jesus Andres Yepez Morlets (Melita).
Fil-logħba preċedenti, iż-żewġ timiijiet spiċċaw fi draw ta’ 3-3.
Birkirkara v Gzira U. – Birkirkara jinżlu b’moral għoli għal din il-logħba wara li għelbu lil Balzan bl-iskor ta’ 5-2.
Min-naħa ta’ Gzira United, dawn iridu jinsew it-telfa ta’ 1-0 kontra Mosta u jridu jagħrfu kif jirriorganizzaw hekk kif għandhom ostaklu diffiċli qud- diemhom .
Il-Karkariżi jittamaw li l-attakkant, Maxuell Maia, ikun fl-aqwa forma hekk kif fir-rebħa fuq Balzan skorja tliet goals, it-tieni hat-trick staġjonali tiegħu, biex s’issa huwa l-aħjar skorer tal-istaġun, bi 13-il goal.
Għall-Maroons, Thaylor Aldama u Marcelo Dias jirritornaw minn sospensjoni.
Fl-Ewwel Fażi, Birkirkara ħarġu rebbieħa bl-iskor ta’ 1-0.
Sliema W. v Naxxar L. – Sorpriżi minn Zabbar St Patrick bl-iskor ta’ 1-0, Sliema Wanderers jimmiraw li jirritornaw għar- rebħ meta jiltaqgħu kontra Naxxar Lions.
Min-naħa tagħhom il- Lions ilhom ma jegħlbu lill-Wanderers mit-13 ta’ Frar, 2016, bl-iskor ta’ 2-1.
U din tista’ tkun okkażjoni biex jirrepetu dak is-suċċess hekk kif il-Wanderers ma jistgħux jinkludu lit-tliet players, Gustavo Alcino, Simon Zibo u Murilo Henrique Freire Bernardo minħabba li jinsabu sospiżi … b’dan tal-aħħar jiskonta t-tielet waħda matul l-istaġun.
Fl-Ewwel Fażi, is-Slimiżi għelbu lin-Naxxarin bl-iskor ta’ 3-0.
Marsaxlokk v Zabbar SP – Wara l-umiljazzjoni ta’ 6-1 kontra Hamrun Spartans, Marsaxlokk jiltaqgħu kontra Zabbar St Patrick li jinsabu f’forma brillanti hekk kif mill-aħħar ħames ħarġiet kisbu xejn inqas minn 13-il punt.
Huma se jkunu msaħħa bir-ritorn ta’ Brian Ariel Gambarte u Joao Pedro De Sa Mendonca minn sospensjoni filwaqt li Lucas Lopez Dessypris jirritorna għax-Xlukkajri.
Fiż-żewġ partiti ta’ bejniethom, Marsaxlokk rebħu l-ewwel waħda 3-1 bl-oħra tispiċċa fi draw ta’ 2-2.
Balzan v Mosta – Balzan, l-aktar team li ddiżappunta f’dan l-istaġun, jilagħbu kontra Mosta li ġejjin minn rebħa ta’ 1-0 fuq Gzira United.
Dan huwa konfront miftuħ bir-rebħa tista’ tmur kull naħa u bl-iċken żball jista’ jkun detrimentali.
Il-Mostin ma jistgħux jinkludu lil Jake Vassallo li jinsab sospiż.
Fl-Ewwel Fażi, iż-żewġ timijiet temmew fi draw ta’ 2-2.
