Qormi Daikin rebħu l-kompetizzjoni Knock-Out tal-Hockey wara li għelbu lil Floriana Young Stars 3-0.
Kienet logħba li laħqet il-qofol tagħha fl-aħħar 20 minuta logħob hekk kif Qormi skorjaw il-gowls li tawhom ir-rebħa finali. Fil-fatt tul l-ewwel tliet quarters, il-Furjaniżi kienu ferm dixxiplinati tattikament fejn bdew jippruvaw jitilgħu b’kontrattakki perikolużi. Min-naħa tagħhom, Qormi kellhom ħafna mill-pussess fejn ippruvaw joħolqu xi ċansijiet ta’ skor.
Kien lejn l-aħħar tat-tielet quarter li Qormi marru minn fuq hekk kif kien Nathan Pace Gasan li daħal tajjeb u xeħet il-ballun fir-rokna tax-xibka.
Fl-aħħar quarter, is-sofor u s-suwed skorjaw żewġ gowls oħra, l-ewwel permezz ta’ Luke Bajada filwaqt li Nathan Pace Gasan żied ieħor sabiex skorja doppjetta personali.
B’hekk Qormi rebħu dak kollu li joffri l-hockey lokali tul dan l-istaġun. Fi tmiem il-konfront, il-president tal-Hockey Association of Malta David Agius ippreżenta t-tazza lill-captain ta’ Qormi Daikin Steve Tanti.
Umpires kienu Alessandro Amore u Silvio Peralta.