Żagħżugħ ta’ 20 sena ġie kkundannat sentenza sospiża wara li ammetta illi ħaraq żewġ muturi. Iż-żagħżugħ, residenti n-Nadur (Għawdex), tressaq il-Qorti iktar kmieni llum b’rabta ma’ ħruq ta’ żewġ muturi.
Il-każ seħħ nhar it-2 ta’ Settembru li għadda meta għall-ħabta tal-5:30 p.m., il-Pulizija, flimkien mal-membri tad-Dipartiment tal-Protezzjoni Ċivili, intalbu jassistu fi Triq Piju Cellini, in-Nadur.
Hemmhekk instabu żewġ muturi, li kienu pparkjati quddiem residenza, jaqbdu. Wara li ntfew in-nirien, minnufih bdew l-investigazzjonijiet tal-Pulizija, waqt li ġiet infurmata l-Maġistrat tal-Għassa Dr Simone Grech li ħatret inkjesta.
Iż-żagħżugħ tressaq taħt arrest fil-Qorti t’Għawdex quddiem il-Maġistrat Dr Brigitte Sultana akkużat li volontarjament ħaraq żewġ muturi, kif ukoll li għamel ħsara fuq faċċata ta’ residenza privata kawża tan-nirien.
Huwa ammetta l-akkużi miġjuba kontrih u ġie kkundannat sena ħabs sospiża għal tliet snin, kif ukoll ingħatat ordni ta’ trattament fil-konfront taż-żagħżugħ.
