Il-Fondazzjoni OASI ħabbret li se torganizza t-12-il edizzjoni tal-OASI Cup Run & Fun Walk nhar il-Ħadd 4 ta’ Ottubru 2026, fir-Rabat, Għawdex.
L-attività annwali tgħaqqad nies ta’ kull età biex tippromwovi stil ta’ ħajja aktar b’saħħtu, il-parteċipazzjoni fil-komunità u, fuq kollox, il-messaġġ li l-irkupru mill-vizzju huwa possibbli.
Din is-sena se jkun hemm diversi tiġrijiet u mixjiet, fosthom ġirja ta’ 10 kilometri għall-adulti, ġirja ta’ 5 kilometri, Fun Walk ta’ 5 kilometri u tiġrijiet għat-tfal.
Se jkun hemm ukoll Family Walk għall-familji u Group Walk għall-gruppi ta’ ħbieb jew kollegi.
Novità għal din is-sena hija l-Buddy Run, li hija ispirata mis-sistema ta’ “Buddy” li tintuża fil-programm residenzjali tal-OASI. Il-parteċipanti se jkunu jistgħu jiġru f’pari, jinkoraġġixxu lil xulxien u jwasslu l-messaġġ ta’ appoġġ u rkupru fil-komunità.
Il-Buddy Run se jkun disponibbli għall-ġirjiet ta’ 5 u 10 kilometri, filwaqt li kull parteċipant se jirċievi r-riżultat u l-ħin individwali tiegħu.
L-OASI qed tħeġġeġ lill-familji, ħbieb, skejjel, postijiet tax-xogħol u gruppi tal-komunità biex jieħdu sehem, irrispettivament mil-livell ta’ saħħa fiżika tagħhom.
Il-Fondazzjoni OASI tgħid li l-messaġġ wara l-attività jibqa’ wieħed ta’ tama, reżiljenza u solidarjetà ma’ persuni u familji affettwati mill-vizzju.