Kien għall-ħabta tal-4.00pm meta fil-bypass ta’ Birkirkara seħħ inċident tat-traffiku fejn mill-inqas żewġ persuni kellhom jiddaħlu l-isptar.
Kelliem għall-pulizija qal lil dan is-sit li s-sewwieq ma sofra l-ebda ġrieħi tant li baqa’ fuq il-post, iżda mhux l-istess jista’ jingħad għal mara ta’ 42 sena residenti l-Imsida u tifel ta’ 11-il sena.
Fuq il-post mar tim mediku b’ambulanza li wara li taw l-ewwel għajnuna liż-żewġ persuni ttieħdu l-Isptar Mater Dei għal aktar kura.
It-triq kienet magħluqa għal xi ħin għat-traffiku.
Il-kundizzjoni tal-persuni li ddaħlu l-isptar s’issa għadha mhix magħrufa, iżda hu eskluż li jinsabu fil-periklu tal-mewt.
Il-pulizija qiegħda tinvestiga dan il-każ.
