It-team nazzjonali Malti mmexxi mill-coach Devis Mangia, illum jilgħab id-disa’ logħba tiegħu minn Grupp H ta’ kwalifikazzjoni għat-Tazza tad-Dinja 2022 meta fl-Istadium Nazzjonali jaffaċċja lill-Kroazja.
S’issa, Malta lagħbet tmien partiti f’dan il-grupp meqjus bħala wieħed ferm diffiċli fejn kisbet rebħa ta’ 3-0 u draw ta’ 2-2 kontra Ċipru, draw ieħor ta’ 2-2 kontra s-Slovakkja filwaqt li sofriet ħames telfiet.
It-team għadu ġej minn punt kontra Ċipru, f’Larnaca, liema partita ntlagħbet ix-xahar li għadda biex il-moral jinsab ferm għoli.
Minkejja kollox, il-coach Mangia f’konferenza stampa li ta aktar kmieni l-ġimgħa l-oħra huwa sostna li l-importanti hi li kulħadd iżomm saqajh mal-art minħabba li t-team nazzjonali għaddej minn proċess ta’ żvilupp u kollox jieħu ż-żmien tiegħu.
Intant, fil-konferenza stampa li ġiet indirizzata proprju lbieraħ, il-coach Mangia qal li kulħadd jaf il-qawwa tal-Kroazja tant li ddeskrivihom bħala wieħed mill-aqwa timijiet fid-dinja fil-preżent, iżda jinsab fiduċjuż li tabilħaqq nistgħu niksbu riżultat pożittiv minn din il-partita.
Huwa sostna li l-players tiegħu jinsabu preparati sa snienhnom għal dan il-konfront u kull player li sejjaħ, ħlief tnejn jew tlieta li ma jinsabux fl-aqwa forma possibbli, huma disponibbli għall-partita tal-lum.
Huwa tenna: “Ninsab ferm kuntent bl-attitudni tal-players tiegħi fejn fost oħrajn niddeskrivi s-sessjoni ta’ taħriġ li kellna matul il-jum tat-Tlieta bħala waħda mill-aqwa jekk mhux l-aqwa li mexxejt kemm ilni coach tat-team nazzjonali. Dan għandu jawgura tajjeb għall-partita tal-lum kontra l-ġganti tal-Kroazja.”
F’din il-konferenza tal- aħbarijiet tkellem ukoll il-captain ta’ Hibernians, Bjorn Kristensen, li wara li matul ix-xahar li għadda kontra s-Slovenja u Ċipru ma kienx fl-azzjoni minħabba injury, se jkun qed jirritorna għal din il-partita u sussegwentement kontra s-Slovakkja.
Huwa ddeskriva l-ambjent fid-dressing room Maltija bħala wieħed san u qal li hu u l-players sħabu se jkunu qed jagħtu dak kollu possibbli kontra l-Kroati.
L-aħħar partita kontra l-Kroazja kienet fit-30 ta’ Marzu li għadda, fi Stadion Rujevica, f’Rijeka, fejn l-avversarji ħarġu rebbieħa bl-iskor ta’ 3-0.
Dan wara li l-Maltin żammew lill-Kroati għal aktar minn siegħa ‘l barra mill-kaxxa difiża minnhom, iżda mad-dħul tal-players veterani Ivan Perisic u Luka Modric, it-team ittrasforma ruħu, tant, li ż-żewġ players fetħu vantaġġ doppju filwaqt li Josip Brekalo, li daħal ukoll bħala sostitut, issiġilla r-rebħa lejn tmiem il-partita.
Il-Kroati, jinsabu fit-tieni post ta’ dan il-grupp meta kisbu 17-il punt, żewġ punti inqas mil-leaders, ir-Russja.
Għalkemm il-kwalifikazzjoni tagħhom għat-Tazza tad-Dinja tidher kważi ċerta, Dalic xorta waħda għandu l-għan li jakkwista l-ewwel post tal-grupp u l-logħba li għandhom nhar il-Ħadd li ġej kontra l-istess Russi tagħti indikazzjoni finali ta’ fejn se jispiċċaw fil-klassifika.
Malta u l-Kroazja ltaqgħu disa’ darbiet fl-istorja fejn il-Kroati rebħu tmien darbiet bil-logħba l-oħra tintemm fi draw.
Mangia għadu ma jistax jinkludi lil James Brown fl-iskwadra minħabba li qed ibati minn injury. Minkejja kollox hu sejjaħ l-aqwa players possibbli inkluż il-goalkeeper Henry Bonello li rkupra wara li weġġa’ proprju kontra Ċipru.
Min-naħa tal-coach tal- Kroazja, dan m’għandux problemi partikolari ħlief għal Mateo Kovacic li jinsab imweġġa’.