Real Madrid ħarġu stqarrija qawwija kontra l-President ta’ La Liga, Javier Tebas, wara l-kummenti tiegħu dwar id-derby ta’ Madrid kontra Atletico. Atletico rebħu l-partita 2-1, iżda l-attenzjoni wara l-konfront inbidlet fuq id-deċiżjonijiet tar-referee, Ortiz Arias.
Il-coach ta’ Real Madrid, José Mourinho, sostna li kien hemm żewġ azzjonijiet li kellhom iwasslu għal karti ħomor: tackle perikoluża ta’ Cristian Romero fuq Jude Bellingham u oħra ta’ Lee Kang-in fuq Fede Valverde. Waqt il-konferenza stampa ta’ wara l-logħba, Mourinho ippreżenta folji stampati b’immaġini tal-azzjonijiet u wera lill-ġurnalisti dak li huwa qies bħala provi tal-iżbalji tar-referee.
Tebas, wieġeb billi ċaħad li hemm “konfoffa tal-kontroll tar-referees” kontra Real Madrid. Il-kummenti tiegħu wasslu lill-club biex jippubblika stqarrija twila li fiha ġie akkużat li ripetutament “jattakka” lil Real Madrid u jagħmel kummenti pubbliċi li jagħmlu ħsara lill-immaġni tal-club.
Real Madrid qalu li huwa partikolarment inkwetanti li l-persuna responsabbli mill-interessi tal-clubs kollha ta’ La Liga tkompli tagħmel lill-club suġġett ta’ attakki pubbliċi. Huma kkritikaw ukoll lil Tebas talli, skont huma, indaħal fi kwistjonijiet relatati mal-istrateġija sportiva tal-club.
Fl-aħħar tal-istqarrija, Real Madrid sostnew li l-football professjonali Spanjol għandu bżonn tmexxija ġdida li topera b’mod newtrali, onest u responsabbli. Il-club enfasizza li l-President ta’ La Liga għandu jaqdi lill-clubs kollha u mhux jaġixxi bħala sid tal-kompetizzjoni.
