Wayne Attard inħatar coach tat-timijiet nazzjonali tat-tfajliet ta’ Malta ta’ taħt il-15-il sena u ta’ taħt is-17-il sena, u se jkun qed iġib miegħu esperjenza internazzjonali siewja u impenn qawwi lejn l-iżvilupp tal-players żgħażagħ.
Wara diversi snin jaħdem barra minn Malta, Attard se jkun qed jirritorna fi ħdan il-Malta FA, fejn jinsab ħerqan li jikkontribwixxi għall-iżvilupp tal-ġenerazzjoni li jmiss ta’ players tal-football femminili Maltin.
“Huwa unur u privileġġ kbir li ngħatajt l-opportunità li nerġa’ naħdem mal-Assoċjazzjoni Maltija tal-Football. Wara li qattajt numru ta’ snin barra minn Malta, inħoss li ksibt esperjenza siewja, mhux biss bħala coach, iżda wkoll bħala mexxej u edukatur,” qal Attard.
“L-għan ewlieni tiegħi huwa li noħloq ambjent pożittiv, professjonali u ta’ sfida, fejn il-players iħossuhom kunfidenti, jieħdu gost jirrappreżentaw lil pajjiżhom u jkunu mħeġġa jilħqu l-potenzjal sħiħ tagħhom.”
Attard enfasizza l-importanza li l-iżvilupp individwali tal-players jinżamm f’bilanċ mas-suċċess tat-team, filwaqt li saħaq li r-riżultati m’għandhomx jinkisbu għad-detriment tal-progress fit-tul.
“Ir-rebħ huwa importanti, speċjalment meta tkun qed tirrappreżenta lil pajjiżek, iżda qatt m’għandu jsir għad-detriment tal-iżvilupp fit-tul. L-għan tagħna mhuwiex biss li nħejju lill-players għal-logħba li jmiss, iżda wkoll għall-istadju li jmiss fil-karrieri tagħhom.”
Meta tkellem dwar il-pjani tiegħu għall-futur, Attard qal li jrid jistabbilixxi rotta ċara li twassal lill-players lejn il-football internazzjonali fil-livell tal-kbar. Dan se jinvolvi ħidma fuq l-iżvilupp ta’ players b’kapaċitajiet tekniċi tajbin, intelliġenza tattika u saħħa mentali.
“Il-kollaborazzjoni mal-coaches tal-clubs hija essenzjali biex niżguraw żvilupp kontinwu. Fl-aħħar mill-aħħar, is-suċċess mhux se jitkejjel biss bir-riżultati, iżda wkoll minn kemm players jirnexxilna ngħinu jimxu ’l quddiem fil-mogħdija tat-timijiet nazzjonali u jaslu sal-livell internazzjonali tal-kbar.”
Il-ħatra ta’ Attard tkompli ssaħħaħ l-impenn tal-MFA biex trawwem it-talenti żgħażagħ u tħejji lill-ġenerazzjoni li jmiss ta’ players għall-isfidi tal-football internazzjonali.
