Raġel ta’ 33 sena, li jgħix iċ-Ċentru miftuħ ta’ Ħal Far, ġie kkundannat 12-il xahar ħabs effettiv wara li wieġeb ħati li għamel ħsara f’supermarket f’San Ġiljan, hedded żewġ persuni u kiser il-paċi pubblika waqt li kien taħt l-effetti tal-alkoħol.
Abdulahi Ahmed Bashir tressaq il-Qorti nhar il-Ġimgħa b’rabta ma’ inċident li seħħ il-Ħamis filgħaxija, bejn it-8:15pm u d-9:00 pm, f’Little Greens Supermarket fi Triq San Ġorġ.
Skont l-akkużi ppreżentato mill-Ispettur tal-Pulizija James Turner, Bashir allegatament wettaq reati kemm fuq ġewwa kif ukoll barra l-ħanut. Ir-raġel ġie mixli wkoll li kien fis-sakra f’post pubbliku f’livell li ma setax jieħu ħsieb tiegħu nnifsu, li kiser il-paċi pubblika b’għajjat u storbju, li kien qed jgħix ħajja ta’ għażż u vagabundaġġ, kif ukoll li hedded żewġ individwi.
Meta l-maġistrata staqsietu għal ismu, Bashir sempliċiment qal: “Ħati jien, ‘tini sentenza”, qabel ma beda jgħid xi kliem li ma kienx jinfiehem. Id-difiża insistentement ħeġġet biex jirrifletti dwar l-ammissjoni tiegħu, billi tfakkru fil-fedina penali tiegħu u twissih li ammissjoni ta’ ħtija kienet se twassal għal pieni koroh minħabba r-reċidività.
Il-maġistrat ukoll ħeġġet lill-akkużat biex jaħsibhiex darbtejn hekk kif kienet qed tfittex fil-paġni bil-kontravvenzjonijiet tal-kondotta kriminali tiegħu, fejn qaltlu: “Naf x’ilek tagħmel f’Malta”. Madankollu, Bashir irrifjuta li jikkontesta l-arrest jew l-akkużi, filwaqt li insista: “Guilty me, give me sentence, I go, I don’t come back” (Ħati jien, agħtini sentenza, mmur u ma nerġax niġi).
Fid-dawl tal-ammissjoni persistenti tiegħu, il-Qorti sabet lil Bashir ħati tal-akkużi kollha miġjuba kontrih.
Huwa ġie kkundannat 12-il xahar ħabs effettiv. Il-Qorti ordnatlu wkoll iħallas €800 f’kumpens lil Little Greens Supermarket għall-ħsarat li kkawża, filwaqt li ngħata żmien biex iħallas din is-somma wara li joħroġ mill-ħabs.
Barra minn hekk, il-Qorti ħarġet ordni ta’ trażżin għal perjodu ta’ sentejn.
Il-każ kien presedut mill-Maġistrat Tanya Sammut.
