Minn tal-inqas 20 persuna, inkluż tfal, inqatlu f’attakk f’kamp fil-Myanmar li seħħ bejn il-lejl tat-Tnejn u t-Tlieta filgħodu. Il-kamp jinsab f’żona kkontrollata mill-Organizzazzjoni għall-Indipendenza Kachin (KIO), grupp li qed jiġġieled il-ġunta li tmexxi l-pajjiż. Kellliem għall-organizzazzjoni qal li l-vittmi kienu kollha ċivili.
Uffiċjali Kachin qalu li l-ġunta żiedet l-attakki matul is-sena li għaddiet minħabba li l-appoġġ ta’ Kachin qed ikompli jikber għal gruppi ribelli oħra li qed jiġġieldu l-gvern militari. Il-Myanmar ilha mdaħħla f’kunflitt minn meta kolp ta’ stat militari tal-2021 għamel bidla fil-Gvern ċivili tal-pajjiż.
Il-Gvern ta’ Unità Nazzjonali (NUG) eżiljat akkuża lill-ġunta għall-attakk fuq il-kamp, u ddeskrivih bħala kriminalità tal-gwerra u kriminalità kontra l-umanità. Il-kelliem tal-Junta, Zaw Min Tun ċaħad li l-militar kien wara l-attakk. Huwa sostna li l-armata m’għandha l-ebda operazzjoni fiż-żona iżda qal li l-qerda kienet probabbilment ikkawżata minn splussivi maħżuna.
L-uffiċjali jemmnu li mill-inqas 11-il tifel u tifla huma fost dawk li nqatlu. Sitta u ħamsin persuna oħra ndarbu wkoll fl-aħħar attakk, li 44 minnhom kienu ttieħdu l-isptar għall-kura. In-Nazzjonijiet Uniti fil-Myanmar qalet li hija mħassba ħafna dwar ir-rapporti ta’ mwiet fil-kamp. Iż-żona madwar il-kamp, li tinsab fuq il-fruntiera maċ-Ċina, esperjenzat kunflitt għal għexieren ta ‘snin.
F’Ottubru li għadda, inqatlu aktar minn 60 persuna minħabba attakki militari mill-ajru fuq Anampa fl-Istat ta’ Kachin.
