Il-Qorti semgħet dwar tfittxijiet fil-proprjetajiet ta’ Theuma, il-flus kontanti li nstabu u t-testment tiegħu. Il-ġuri ta’ Yorgen Fenech kompla s-Sibt b’sensiela ta’ xhieda tekniċi dwar l-investigazzjoni tal-qtil ta’ Daphne Caruana Galizia. Il-Qorti semgħet kif il-pulizija sabet kważi €800,000 fi flus kontanti fil-pussess ta’ Melvin Theuma, filwaqt li espert tal-IT spjega kif inġabru u ġew ippreservati l-provi diġitali.
L-akbar żvilupp tas-seduta kien ix-xhieda li Theuma kellu €797,000 fi flus kontanti, flimkien ma’ kważi £6,000 u madwar $2,000, miżmuma f’boroż kbar tal-flus. L-espert tal-IT Keith Cutajar qal li kien responsabbli biex jiġbed u jippreserva d-data minn diversi apparati elettroniċi miġbura waqt l-investigazzjoni. Fost l-oħrajn, huwa analizza apparat elevat mid-dar tal-eks Chief of Staff tal-Prim Ministru, Keith Schembri, ġibed data maħżuna fil-cloud u wettaq tfittxijiet permezz ta’ kliem ewlieni relatat mal-każ.
Huwa żied li ma rnexxilux jiġbed data minn żewġ apparati minħabba limitazzjonijiet tekniċi. Cutajar xehed ukoll dwar il-proċess biex jinfetħu l-mowbajls ta’ Johann Cremona u Kenneth Camilleri. Għal dan il-għan, l-apparati ntbagħtu f’laboratorju fil-Ġermanja. Barra minn hekk, huwa kien inkarigat jiġbed u jippreserva filmati tas-CCTV, rekords tat-telekomunikazzjoni u recordings relatati mal-investigazzjoni.
Matul il-kontroeżami, il-ġurati staqsew jekk kienx possibbli li tinħoloq kopja eżatta tad-data ta’ mowbajl li ma kienx għadu disponibbli. Cutajar wieġeb li dan ma kienx possibbli mingħajr l-apparat innifsu. Spjega wkoll li biex tinkiseb data maħżuna fil-cloud kienu meħtieġa l-passwords tal-kontijiet rispettivi.
Aktar tard, il-Qorti semgħet ukoll ix-xhieda ta’ żewġ avukati li kienu involuti fl-inkjesta. Wieħed minnhom qal li tfittxijiet fir-Reġistru tal-Proprjetà wrew li Theuma kien għamel testment fis-7 ta’ Diċembru 2017, jumejn wara li tressqu l-Qorti l-aħwa Degiorgio u Vince Muscat. Instab ukoll li Edgar Brincat kien biegħlu garaxx xi snin qabel.
Is-seduta kellha tieqaf għal madwar nofs siegħa minħabba storbju qawwi ta’ logħob tan-nar fil-viċinanzi tal-Qorti. Wara kompliet u aktar tard waqfet għall-waqfa tal-ikel ta’ nofsinhar.