Esplora, iċ-Ċentru Interattiv tax-Xjenza operat mill-aġenzija ta’ finanzjament u politika tal-Gvern għar-riċerka u l-innovazzjoni Xjenza Malta, ipparteċipa fil-Ġimgħa Internazzjonali ta’ Beijing dwar il-Litteriżmu Xjentifiku 2026, li ġiet organizzata fiċ-Ċentru tax-Xjenza ta’ Beijing fiċ-Ċina. Dan l-avveniment internazzjonali laqqa’ flimkien ċentri tax-xjenza, mużewijiet u organizzazzjonijiet minn madwar id-dinja biex isaħħu l-kollaborazzjoni, jiffaċilitaw l-iskambju tal-għarfien u jippromwovu l-litteriżmu xjentifiku.
Fit-23 ta’ Settembru, is-Senior Director ta’ Esplora, Mary Ann Cauchi, kienet mistiedna bħala kelliema f’dan l-avveniment, fejn ippreżentat l-Istrateġija 2030 ta’ Esplora, “Inspiring Curious Minds to Shape Our Future”. Il-preżentazzjoni ddeskriviet il-viżjoni u l-ambizzjonijiet taċ-Ċentru għas-snin li ġejjin, b’enfasi qawwija fuq l-involviment fix-xjenza u t-tisħiħ tal-ġenerazzjonijiet futuri.
Fl-24 ta’ Settembru, is-Sa Cauchi pparteċipat fil-Laqgħa Annwali tal-2026 tal-Beijing Global Network of Science Festivals (BGNSF) u r-Roundtable tal-Festival Internazzjonali tax-Xjenza, fejn tlaqqgħu flimkien organizzazzjonijiet membri tal-BGNSF u rappreżentanti internazzjonali. Id-diskussjonijiet iffukaw fuq il-bini ta’ netwerk u pjattaforma internazzjonali ta’ kollaborazzjoni fil-komunikazzjoni tax-xjenza, l-iżvilupp ta’ mudell ta’ ospitalità rotazzjonali għal-laqgħat futuri tal-BGNSF, u l-faċilitazzjoni tal-kooperazzjoni fl-iskambju ta’ esibizzjonijiet, programmi ta’ edukazzjoni xjentifiċi u riżorsi oħra għall-involviment fix-xjenza. Il-laqgħa indirizzat ukoll aspetti prattiċi tal-kooperazzjoni internazzjonali, inkluż it-trasport transfruntier u l-iżdoganar tal-merkanzija.
Waranofsinhar, is-Sa Cauchi pparteċipat fis-Sessjoni ta’ Project Presentation & Matchmaking, li laqqgħet flimkien mużewijiet internazzjonali tax-xjenza u organizzazzjonijiet relatati biex jaqsmu proġetti, jiskambjaw ideat u jesploraw sħubijiet potenzjali. Esplora ppreżenta żewġ inizjattivi proposti: ir-Researchers’ Corner ta’ Esplora, li tgħaqqad lill-viżitaturi direttament ma’ studenti, riċerkaturi u akkademiċi fil-bidu tal-karriera tagħhom permezz ta’ dimostrazzjonijiet u konverżazzjonijiet informali, u l-Young Researchers’ Grant ta’ Esplora, li jappoġġja żgħażagħ ta’ bejn it-13 u l-21 sena biex iwettqu proġetti ta’ riċerka oriġinali bl-għajnuna ta’ mentoring u appoġġ finanzjarju.
Matul il-ġimgħa, ir-rappreżentanti ta’ Esplora taw ukoll dimostrazzjonijiet diretti ta’ attivitajiet edukattivi tax-xjenza, li juru l-approċċ prattiku taċ-Ċentru għall-involviment fix-xjenza u t-tagħlim informali lil udjenza internazzjonali.
Il-parteċipazzjoni ta’ Esplora kompliet issaħħaħ il-preżenza internazzjonali taċ-Ċentru u trawwem opportunitajiet ġodda għall-kollaborazzjoni, l-iskambju tal-għarfien u s-sħubijiet.
Għaxar snin wara li fetaħ il-bibien tiegħu, Esplora jkompli jħares ’il barra u ’l quddiem, jibni fuq deċennju ta’ kisbiet filwaqt li jsegwi l-viżjoni tiegħu li “jispira mħuħ kurjużi biex isawru l-futur tagħna”.