Raġel ta’ 51 sena, ġie ordnat ma jersaqx lejn iż-Żejtun u nħarġet ordni ta’ protezzjoni favur martu
Ħaddiem tal-Freeport ta’ 51 sena ngħata l-ħelsien mill-arrest wara li wieġeb mhux ħati għal akkużi relatati ma’ allegat theddid fil-konfront ta’ martu u li ġiegħelha tibża’ li kienet se tintuża vjolenza kontriha, fil-jiem bejn is-26 ta’ Ottubru u t-3 ta’ Novembru.
L-imputat ċaħad l-akkużi miġjuba kontrih meta tressaq il-Qorti.
Sorsi indikaw li bejn il-koppja kien inqala’ argument, li matulu l-imputat allegatament insulta lil martu. Meta l-vittma sussegwentement għamlet rapport dwar vjolenza domestika, il-valutazzjoni tar-riskju kklassifikat il-każ bħala wieħed ta’ riskju għoli.
Id-difiża talbet il-ħelsien mill-arrest.
Il-Prosekuzzjoni ma oġġezzjonatx għall-ħelsien mill-arrest, bl-ispettur jgħid lill-Qorti li kien hemm problemi familjari fid-dar tal-koppja. Huwa sostna li l-ħruġ ta’ ordni ta’ protezzjoni jkun biżżejjed biex tiġi salvagwardjata l-vittma.
Min-naħa tagħha, id-difiża rrimarkat li ma kien hemm l-ebda aggressjoni fiżika u argumentat li ċ-ċirkostanzi jistgħu jinbidlu. Żiedet tgħid li l-akkużat kien lest josserva kwalunkwe kundizzjoni imposta mill-Qorti.
Xehdet ukoll oħt l-akkużat, li kkonfermat li ħuha kien se joqgħod magħha jekk jingħata l-ħelsien mill-arrest.
Il-Qorti laqgħet it-talba għall-ħelsien mill-arrest fuq depożitu ta’ €2,000 u garanzija personali ta’ €10,000. L-akkużat ġie ordnat ukoll jiffirma l-għassa kull nhar ta’ Tnejn, Ħamis u Ħadd bejn il-5am u t-8pm.
Il-Qorti ordnat ukoll lill-akkużat biex ma jersaqx lejn iż-Żejtun.
Inħarġet ukoll ordni ta’ protezzjoni favur il-vittma.
Il-Maġistrat wissiet lill-imputat biex iqis il-konsegwenzi tal-azzjonijiet tiegħu.
Il-Maġistrat tal-Għassa Astrid May Grima ppresediet is-seduta.
L-Ispettur Omar Zammit mexxa l-Prosekuzzjoni, filwaqt li l-avukat Beppe Darmanin deher għall-akkużat.