Il-Forzi Armati ta’ Malta salvat 53 immigrant irregolari, li sabu ruħhom f’diffikultà meta kienu madwar 50 mil nawtiku fil-Lvant ta’ Malta, ’il barra mill-ibħra territorjali. Sfortunatament 11-il persuna ttellgħu mejta mill-baħar.
Kien tard il-Ħadd filgħaxija, meta l-Malta Vessel Traffic Services irċieva notifika minn bastiment tas-sajd rigward dgħajsa li kienet qiegħda ġġorr migranti irregolari u li kienet f’diffikultà.
L-informazzjoni li rċevew indikat li diversi persuni kienu waqgħu l-baħar waqt li kienu qed jipprovaw jilħqu l-bastiment tas-sajd li kien qiegħed jagħti l-għajnuna.
Iċ-Ċentru ta’ Koordinazzjoni tas-Salvataġġ minnufih ta struzzjonijiet lill-bastiment tas-sajd, flimkien ma’ bastimenti oħra fil-viċin, sabiex jagħtu l-għajnuna meħtieġa. Fl-istess ħin, membri tal-Forzi Armati ta’ Malta ħarġu jagħtu l-għajnuna tagħhom flimkien mal-Gwardja tal-Kosta Taljana.
Il-FAM qalet li t-53 migrant irregolari li ġew salvati ngħataw l-assistenza medika u persuna minnhom kellha bżonn kura medika urġenti u ġiet trasferita permezz ta’ ajruplan tal-Forzi Armati ta’ Malta.
Malli waslu fuq l-art, il-persuni li ġew salvati u l-katavri li ttellgħu mill-baħar ġew trasferiti lill-awtoritajiet kompetenti sabiex jingħataw aktar assistenza u jsiru l-proċeduri meħtieġa.
F’kitba fuq X, il-Ministru tal-Intern u s-Sigurtà Glenn Bedingfield appella għal azzjoni Ewropea b’saħħitha kontra t-traffikar tal-bnedmin u għal approċċ Mediterranju kkordinat dwar il-migrazzjoni biex ikunu evitati aktar traġedji.
