Oliver James Lawson, Irlandiż ta’ 37 sena ma ngħatax il-ħelsien mill-arrest wara li kien akkużat li importa 6 kilogrammi kannabis.
Hu kien mixli wkoll li ffalsifika dokumenti b’rabta mal-identità tiegħu.
Il-Prosekuzzjoni quddiem il-Maġistrat Donatella Frendo Dimech qalet li l-Irlandiż kien arrestat meta pulizija libes ta’ pustier mar jagħtih pakkett. Ir-raġel induna b’dan kollu u hekk kif ra l-pulizija pprova jaħrab iżda hu ġie arrestat ftit tal-ħin wara.
James Lawson wieġeb mhux ħati għal akkużi kontrih. L-avukati difensuri talbu għall-ħelsien mill-arrest fuq il-bażi li hu ilu jgħix f’Malta u għandu rabtiet ma’ pajjiżna.
Iżda l-prosekuzzjoni oġġezzjonat u qalet li dan jista’ jkun li jibda juża isem ieħor jew inkella l-isem li qed juża hu wieħed falz.
Il-Maġistrat Frendo Dimech ċaħdet it-talba tad-difiża.
