Jake kien tifel li, minkejja li kien għad kellu biss seba’ snin, laħaq livell ta’ maturità li ħafna ma jirnexxielhomx jilħqu.
Hekk iddeskrivieh il-qassis hekk kif illum ingħatatlu l-aħħar tislima.
Il-qassis qal li Jake ma kienx għadu tifel ta’ seba’ snin iżda t-tbatija kienet bidlitu fi bniedem adult. Qal iżda li dan ma seħħx sempliċement għax kiber fl-età, iżda għax kien matur ħafna.
Irrikonoxxa kif din il-maturità kienet tidher f’Jake hekk kif minkejja t-tbatija kollha li kien għaddej minnha, kien kontinwament jaħseb f’ħaddiehor.
“Xi nies għandhom 90 sena u ma jirnexxilhomx jilħqu l-livell ta’ maturità tiegħu. It-tbatija għamlitu raġel. It-tbatija u l-uġigħ bidlu lil Jake minn tifel ta’ 7 snin għal eżempju għalina lkoll,” qal il-qassis.
Iċ-ċkejken tilef ħajtu jumejn ilu wara li kien ilu tliet snin jissielet mal-mard. Għal dawn l-aħħar xhur huwa kien jinsab rikoverat ġewwa Rainbow Ward u kien se jagħlaq tminn snin f’Jannar li ġej.
Fost dawk li selmulu fl-aħħar jiem, Puttinu Cares qalet li Jake għallimhom kif tkun umli, kif ma tieqafx tiġġieled quddiem tbatija kbira, kif tqum kull filgħodu ħerqan biex tgħix u kif tqassam dak kollu li għandek għax f’hekk issib il-ferħ. Huma fakkru kif Jake kien iħobb il-Milied u l-ferħ u li bl-iSweet Shop f’dan iż-żmien kien iqum kull filgħodu anke jekk ma jiflaħx biex iqassam il-ħelu lil kulħadd.
