Daniel Portelli ta’ 42 sena mill-Imsida, iżda residenti Birżebuġia tressaq b’arrest il-Qorti wara li allegatament hedded lill-pulizija permezz ta’ messaġġ fuq messenger. Skont dak li ntqal fil-Qorti, ir-raġel kiteb lill-pulizija li kien se jmur jispara fuq xi ajruplan fl-Ajruport jekk ma jtuhx lura xi affarijiet li ttieħdulu waqt tfittxija fir-residenza tiegħu.
Ir-raġel ammetta li hedded lill-pulizija hekk kif kien qiegħed juża profil falz fuq il-midja soċjali. Hu ammetta wkoll li kiteb li jekk it-talba tiegħu ma tintlaqx ma kienx se jiddejjaq iweġġa’ lin-nies.
Kien nhar it-Tnejn li l-Pulizija marru fir-residenza tiegħu biex jarrestawh fejn hemm saret tfittxija oħra. Il-Prosekuzzjoni qalet li l-oġġetti li kien qiegħed jitlob mingħand il-Pulizija nstabu fir-residenza tiegħu waqt l-aħħar tfittxija.
Minn investigazzjoni li saret, Portelli kellu mill-inqas 6 profili foloz fuq il-midja soċjali. Din ma kinitx l-ewwel darba li Portelli hedded lill-Pulizija hekk kif f’Jannar li għadda hedded ukoll uffiċjal tal-Pulizija li kien se jibgħat xi droines fuq l-ajruport biex jisplodu ajruplan.
Id-difiża spjegat li l-akkużat qal li kienet ċajta bombastika u talbet għal sentenza sospiza.
Il-Maġistrat Claire Stafrace Zammit qalet li qabel ma tagħti s-sentenza l-akkużat għandu jiġi segwiet minn probation officer u jitħejja rapport fuq is-saħħa mentali tiegħu.
Portelli ngħata l-ħelsien mill-arrest fuq garanzija personali ta’ €5,0000.
Il-prosekuzzjoni tmexxiet mill-Ispettur Roxanne Tabone flimkien mal-Avukat Mohammed Shurrab f’isem l-Avukat Ġenerali. Għall-akkużat dehret l-Avukat Rachel Tua.
