Lufthansa kkanċellat mal-20,000 titjira bejn Mejju u Ottubru biex tiffranka l-fjuwil, f’wieħed mill-akbar tnaqqis mil-linji tal-ajru globali hekk kif il-prezzijiet tal-fjuwil irduppjaw wara l-gwerra fl-Iran.
It-trasportatur Ġermaniż ikkanċella madwar 120 titjira kuljum mit-Tnejn u qal li se jneħħi rotot mhux profittabbli minn Munich u Frankfurt sal-aħħar tal-istaġun tas-sajf, li huwa mistenni li jibqa’ għaddej sa nofs Ottubru.
“B’kollox, 20,000 titjira fuq distanzi qosra se jitneħħew mill-iskeda sa Ottubru, ekwivalenti għal madwar 40,000 tunnellata metrika ta’ fjuwil, li l-prezz tiegħu rdoppja minn mindu faqqa’ l-kunflitt fl-Iran,” qalet Lufthansa nhar it-Tlieta.
Il-pjan eżatt għax-xhur tas-sajf se jiġi ppubblikat fl-aħħar ta’ April jew fil-bidu ta’ Mejju. B’hekk se tiġi żgurata l-istabbiltà tal-iskeda għall-perjodu tal-pjan tat-titjira”, żiedet tgħid l-istess kumpanija.
It-tnaqqis ġie kkonfermat hekk kif il-Ministri tat-Trasport Ewropej iltaqgħu nhar it-Tlieta biex jiddiskutu pjanijiet biex jipprevjenu li r-reġjun jispiċċa nieqes mill-fjuwil tal-avjazzjoni. Dan wara li l-Aġenzija Internazzjonali tal-Enerġija wissiet li l-Ewropa kellha inqas minn sitt ġimgħat ta’ provvisti li fadal.
L-UE kienet qed tesplora jekk tistax tikseb fjuwil tal-avjazzjoni Amerikan alternattiv li mhux użat b’mod regolari fl-Ewropa u tista’ tippermetti lill-linji tal-ajru jieħdu ammonti akbar ta’ fjuwil barra mir-reġjun. Dan iddikjarah il-Kummissarju tat-Trasport tal-UE Apostolos Tzitzikostas.
