Hemm mumenti li jmorru lil hinn minn ċerimonja formali. Mumenti li jfakkruna fil-valuri li fuqhom tinbena soċjetà b’saħħitha: ir-rispett, is-servizz, il-kollaborazzjoni u s-sens ta’ komunità. Iċ-ċelebrazzjoni tal-anniversarju tal-Korp tal-Pulizija kienet proprju wieħed minn dawk il-mumenti.
Kien ta’ sodisfazzjon u ta’ unur li l-Assoċjazzjoni tal-Kunsilli Lokali ġiet rikonoxxuta għall-ħidma li qed twettaq flimkien mal-Community Police Team u mat-Tim tal-Koeżjoni. Din mhijiex sempliċement rikonoxximent għal istituzzjoni, iżda konferma li meta l-awtoritajiet pubbliċi jaħdmu flimkien, ir-riżultat ikun ta’ benefiċċju dirett għar-residenti.
Il-kunċett tal-pulizija moderna nbidel ħafna matul is-snin. Illum il-ġurnata l-pulizija m’għadhiex biss forza li tinforza l-liġi. Saret parti integrali mill-komunità. Hija preżenti fl-iskejjel, fil-laqgħat mal-kunsilli lokali, f’attivitajiet edukattivi, fil-prevenzjoni tal-kriminalità u fil-bini ta’ relazzjonijiet ta’ fiduċja mar-residenti.
Dan huwa wkoll il-prinċipju li ilu jmexxi lill-Assoċjazzjoni tal-Kunsilli Lokali. Il-kunsilli lokali huma l-eqreb istituzzjoni għar-resident. Aħna naraw il-ħtiġijiet tan-nies kuljum. Nisimgħu t-tħassib tagħhom, naraw il-problemi tagħhom u nfittxu soluzzjonijiet prattiċi. Iżda l-ebda kunsill ma jista’ jagħmel dan waħdu. Is-suċċess jiġi biss permezz ta’ kollaborazzjoni effettiva ma’ entitajiet oħra.
F’dawn l-aħħar snin rajna kif il-ħidma konġunta mal-Community Police Team u mat-Tim tal-Koeżjoni ġabet riżultati konkreti. Aktar preżenza fil-lokalitajiet, aktar komunikazzjoni mar-residenti, aktar prevenzjoni u aktar sens ta’ sigurtà. Dan huwa mudell ta’ ħidma li għandu jkompli jissaħħaħ.
Matul iċ-ċerimonja kien hemm aspett ieħor li laqatni ferm. Waqt li kont inħares lejn l-uffiċjali preżenti, ma rajtx biss uniformijiet. Rajt persuni.
Rajt irġiel u nisa li jagħmlu xogħol diffiċli ħafna, ħafna drabi taħt pressjoni kontinwa. Rajt ġenituri li jħallu lill-familji tagħhom biex jieħdu ħsieb il-familji tagħna. Rajt individwi li ħafna drabi jkunu l-ewwel li jaslu fuq il-post meta jiġri inċident, meta jkun hemm emerġenza jew meta persuna tkun fil-bżonn.
Kien hemm aspett ieħor ta’ din iċ-ċerimonja li forsi rridu nghatuh aktar importanza, li għalija kien wieħed mill-isbaħ messaġġi tal-ġurnata. Il-premji ma kinux biss deċiżjoni amministrattiva jew rikonoxximent mogħti minn fuq. F’ħafna każijiet, kienu proprju l-kollegi stess ta’ dawk li ġew onorati li nnominawhom għall-premjijiet.
Dan jgħid ħafna dwar il-kultura li teżisti fi ħdan il-Korp. F’kull organizzazzjoni tista’ ssib kompetizzjoni, differenzi ta’ opinjoni u sfidi ta’ kuljum. Iżda meta huma stess il-kollegi jagħrfu l-merti ta’ xulxin u jipproponuhom għal rikonoxximent, dan ifisser li hemm sens ta’ rispett reċiproku, ta’ apprezzament u ta’ familja. Ifisser li s-suċċess ta’ kollega ma jitqiesx bħala telfa għal ħaddieħor, iżda bħala kisba għall-Korp kollu.
Din hija kultura li kull organizzazzjoni għandha taspira għaliha. Kultura fejn il-ħiliet jiġu apprezzati, fejn id-dedikazzjoni tiġi nnutata u fejn il-professjonalità ma tibqax mistura iżda tiġi ċċelebrata. Meta organizzazzjoni tasal biex il-membri tagħha jkunu huma stess li jgħollu lil xulxin, tkun qed tibni ambjent ta’ fiduċja, motivazzjoni u rispett li fl-aħħar mill-aħħar jirrifletti fis-servizz mogħti lill-pubbliku.
Matul iċ-ċerimonja smajna wkoll stejjer li jfakkruna f’xi jfisser tassew is-servizz pubbliku. Stejjer li forsi qatt ma jaslu fuq l-ewwel paġni tal-gazzetti iżda li jagħmlu differenza fil-ħajja tan-nies.
Fosthom kien hemm il-każ tal-uffiċjal tal-pulizija li, mingħajr ma qagħad jaħseb darbtejn, daħal f’penthouse li kienet qabdet in-nar sabiex isalva tifla. Kien hemm ukoll il-każ tal-pulizija li, minkejja li kien barra mis-servizz u mhux fuq il-qadi ta’ dmirijietu, waqaf immedjatament meta lemaħ inċident tat-traffiku, ta l-ewwel għajnuna lill-vittmi u baqa’ magħhom sakemm waslu s-servizzi tal-emerġenza.
Dawn huma eżempji ta’ professjonalità li tmur lil hinn mill-obbligu. Mhumiex atti li wieħed jagħmel għax jinsabu miktuba fid-deskrizzjoni tax-xogħol. Huma atti li joħorġu minn sens qawwi ta’ responsabbiltà lejn il-ħajja tal-oħrajn.
Impressjonat ukoll bl-istorja ta’ kuntistabbli żagħżugħa li ġiet stazzjonata f’wieħed mill-aktar distretti diffiċli fil-pajjiż. Minflok għażlet it-triq l-aktar faċli, għamlet minn kollox biex kull rapport li tikteb ikun preċiż kemm jista’ jkun u jirrifletti fedelment il-kliem u l-esperjenzi tal-vittmi. Għal xi ħadd jista’ jidher dettall amministrattiv. Fir-realtà huwa att ta’ ġustizzja. Rapport miktub b’attenzjoni jista’ jagħmel differenza kbira fil-proċess investigattiv u fil-protezzjoni tad-drittijiet ta’ min ikun qed ifittex il-ġustizzja.
Stejjer oħra kienu jitkellmu dwar inizjattivi personali ta’ membri tal-Korp li, bil-ħila u l-kreattività tagħhom stess, żviluppaw għodod, sistemi jew metodi ta’ ħidma ġodda u mbagħad qasmuhom mal-kollegi tagħhom mingħajr ma żammewhom għalihom. Għamlu dan biex il-Korp kollu jibbenefika u jkun aktar ippreparat biex jaffaċċja l-isfidi dejjem jinbidlu tas-soċjetà moderna.
Dan huwa l-veru tifsir tal-altruwiżmu. Mhux biss li twettaq dmirijietek tajjeb, iżda li tagħmel pass ieħor ‘il quddiem biex tgħin lill-kollegi tiegħek ikunu aħjar, biex taqsam l-għarfien tiegħek u biex tħalli lill-organizzazzjoni aħjar milli sibtha.
Huwa għalhekk li ċ-ċerimonja ma kinitx sempliċement okkażjoni ta’ premjijiet. Kienet ċelebrazzjoni tal-valuri li għandhom ikomplu jmexxu s-servizz pubbliku: il-kuraġġ, il-professjonalità, il-kollaborazzjoni, l-umiltà u s-servizz lejn il-komunità.
Dawn huma l-valuri li jgħaqqdu wkoll lill-Assoċjazzjoni tal-Kunsilli Lokali fil-ħidma tagħha ta’ kuljum. Għax fl-aħħar mill-aħħar, kemm il-pulizija kif ukoll il-kunsilli lokali għandhom l-istess missjoni: li jtejbu l-kwalità tal-ħajja tar-residenti u jibnu komunitajiet fejn kulħadd iħossu sigur, rispettat u parti minn soċjetà li tassew tieħu ħsieb in-nies tagħha.
Hawnhekk tidħol il-kelma li forsi tispjega kollox: umanità.
Wara kull uniformi hemm persuna li tħoss, li tinkwieta, li tagħmel sagrifiċċji u li ta’ kuljum tieħu deċiżjonijiet diffiċli ħafna. Xi kultant ninsew dan il-fatt sempliċi. Naraw biss l-uniformi u ninsew il-bniedem.
Naturalment, bħalma jiġri f’kull organizzazzjoni, jistgħu jseħħu żbalji. L-ebda istituzzjoni mhi perfetta. Iżda jkun żball ferm akbar jekk minħabba każijiet iżolati ninjoraw jew innaqqsu mill-ħidma straordinarja li kull ġurnata jwettqu mijiet ta’ uffiċjali b’dedikazzjoni u professjonalità.
Sfortunatament għad hemm minoranza żgħira fis-soċjetà tagħna li tidher li tieħu din il-ħidma bħala fatt. Xi drabi naraw kummenti fuq il-midja soċjali li jnaqqsu jew jiddiskreditaw lill-pulizija mingħajr ma jirriflettu fuq il-piż tar-responsabbiltà li dawn in-nies iġorru kuljum. U hawn irrid naghmel anki referenza gżall-Qrati tagħna li drabi wara oħra, bid0deċiżjonijiet tagħhom, huma wkoll jistgħu idgħajfu l-moral ta’ min ħadem qatiegħ biex solva każ.
Faċli tikkritika minn wara tastiera. Aktar diffiċli tkun int dak li jrid joħroġ f’nofs ta’ lejl biex jassisti f’inċident serju, jikkalma sitwazzjoni ta’ vjolenza domestika, ifittex persuna vulnerabbli jew jirrispondi għal emerġenza fejn kull sekonda tagħmel differenza.
Il-pulizija ma tagħżilx meta sservi. Isservi meta aħna nkunu qed niċċelebraw mal-familji tagħna, meta nkunu rieqda jew meta nkunu qed ingawdu btala. Hija preżenti kull meta jkun hemm bżonn.
U f’ danil-kuntest, irrid insemmi mument li laqatni b’mod partikolari u li, forsi, kien wieħed mill-aktar mumenti sinifikanti tal-ġurnata. Fost dawk li ġew onorati kien hemm tifel ta’ disa’ snin. Għalkemm għadu ta’ età żgħira, huwa magħruf għall-imħabba u r-rispett kbir li għandu lejn il-Korp tal-Pulizija. Tant hu hekk li għandu anke replika tal-uniformi tal-pulizija u jilbisha bi kburija.
Għal xi wħud dan jista’ jidher bħala dettall żgħir jew sempliċi passatempu tat-tfal. Jien narah b’mod differenti. Narah bħala sinjal ċar li l-Korp qed jirnexxilu jibni relazzjoni pożittiva mal-ġenerazzjonijiet il-ġodda. Meta tifel jara uffiċjal tal-pulizija bħala mudell ta’ servizz, ta’ sigurtà u ta’ fiduċja, ikun ifisser li l-pulizija rnexxielha tkun preżenti fil-komunità mhux permezz tal-biża’ jew tal-awtorità biss, iżda permezz tal-valuri u tal-eżempju. Din hija l-ġenerazzjoni li rridu nkomplu ninvestu fiha. Għax jekk illum dawn it-tfal jitgħallmu jirrispettaw lill-pulizija, jifhmu r-rwol tagħha u jaraw lill-uffiċjali bħala parti mill-komunità tagħhom stess, fi żmien għaxar jew għoxrin sena jkollna ċittadini u residenti li mhux biss jirrispettaw lill-Korp, iżda li jħossuh bħala wieħed minnhom. Soċjetà b’saħħitha tibda billi nibnu din il-fiduċja sa minn età żgħira, u dan huwa investiment li jagħti frott għal ħafna snin li ġejjin.
Dan ma jfissirx li l-pulizija m’għandhiex tibqa’ kontabbli jew miftuħa għall-kritika kostruttiva. Għall-kuntrarju. Iżda hemm differenza kbira bejn kritika ġusta u nuqqas ta’ rispett lejn professjoni li taqdi rwol tant importanti fis-soċjetà.
L-istess japplika għall-kunsilli lokali. Kemm il-kunsilliera, is-segretarji eżekuttivi kif ukoll l-impjegati pubbliċi ħafna drabi jagħmlu xogħol li ftit jidher iżda li huwa essenzjali għall-funzjonament tal-komunitajiet tagħna. Meta dawn l-istituzzjonijiet jingħaqdu flimkien mal-pulizija, mal-protezzjoni ċivili, mas-servizzi soċjali u ma’ organizzazzjonijiet oħra, il-benefiċċju jkun wieħed ċar: residenti li jgħixu f’ambjent aktar sigur u aktar organizzat.
Din hija wkoll il-viżjoni tal-Assoċjazzjoni tal-Kunsilli Lokali. Nemmnu f’kollaborazzjoni li ssaħħaħ u fi sħubijiet li jikbru maż-żmien. Ma nemmnux fil-kompetizzjoni bejn istituzzjonijiet pubbliċi. Nemmnu li kull entità għandha l-esperjenza u r-responsabbiltajiet tagħha u li meta dawn jingħaqdu flimkien, il-pajjiż kollu jibbenefika.
Il-futur tal-gvern lokali ma jistax jinbena fuq ħidma iżolata. Jeħtieġ netwerks ta’ kollaborazzjoni b’saħħithom bejn il-kunsilli lokali, ir-reġjuni, il-pulizija, l-awtoritajiet ċentrali, is-soċjetà ċivili u s-settur privat. Hekk biss nistgħu nibnu komunitajiet aktar reżiljenti, aktar inklussivi u aktar siguri.
Għalhekk, ir-rikonoxximent mogħti lill-Assoċjazzjoni tal-Kunsilli Lokali għandu jservi bħala motivazzjoni biex inkomplu ninvestu f’dawn is-sħubijiet. Mhuwiex il-punt finali ta’ vjaġġ, iżda pass ieħor f’mixja li għandha tkompli tikber.
Nixtieq nagħlaq billi nirringrazzja lill-Korp kollu tal-Pulizija għall-impenn kontinwu tiegħu. Nirringrazzja wkoll lill-Community Police Team u lit-Tim tal-Koeżjoni għall-professjonalità u d-disponibbiltà tagħhom li jaħdmu spalla ma’ spalla mal-kunsilli lokali.
Il-komunitajiet tagħna ma jeħtiġux istituzzjonijiet li jikkompetu bejniethom. Jeħtieġu istituzzjonijiet li jafdaw lil xulxin, li jisimgħu lil xulxin u li jaħdmu flimkien.
Meta dan iseħħ, ir-rebbieħ ikun dejjem wieħed: ir-resident. U din tibqa’ l-missjoni ewlenija tagħna.
