Raġel li allega li ġie aggredit mill-eks sieħba tiegħu talab lill-Qorti sabiex din twaqqaf il-proċeduri kriminali fil-konfront tagħha, u qal li ried ipoġġi l-ġid ta’ binhom ta’ seba’ xhur qabel il-każ.
Il-mara ta’ 29 sena kienet tressqet il-Qorti mixlija li kkaġunat ġrieħi ħfief lill-eks sieħeb tagħha, li hedditu, li nsultatu u li kisret il-kundizzjonijiet ta’ sentenza sospiża.
Il-Qorti semgħet kif l-allegat inċident seħħ għall-ħabta tas-7.30pm f’San Pawl il-Baħar, fejn l-allegat vittma kien flimkien mas-sieħba l-ġdida tiegħu meta ltaqa’ mal-eks sieħba tiegħu.
Skont il-Prosekuzzjoni, il-konfront eskala meta l-mara allegatament bdiet tinsulta verbalment lill-eks sieħeb tagħha qabel aggredietu billi tatu daqqa f’irkoptu tax-xellug u ġibditlu bil-forza l-ġiżirana minn għonqu waqt l-argument.
Ċertifikat mediku aktar tard ikkonferma li l-allegat vittma sofra ġrieħi ħfief. B’riżultat ta’ dan, l-imputata ġiet arrestata fir-residenza tagħha u l-Qorti vvalidat l-arrest.
Madankollu, il-każ daħal f’fażi differenti meta l-allegat vittma stess tela’ jixhed u talab lill-Qorti twaqqaf il-proċeduri kriminali. Huwa spjega li kien qed jagħmel din it-talba minħabba li hu u l-eks sieħba tiegħu għandhom tifel ta’ seba’ xhur u xtaq jagħti prijorità lill-ġid tat-tarbija.
Huwa ammetta li fil-passat kien hemm argumenti oħra bejniethom, fosthom argumenti permezz tal-mowbajl, iżda sostna li dawk qatt ma kienu serji daqs l-inċident li wassal għal dawn il-proċeduri.
Il-Qorti wissietu li jekk il-proċeduri jitwaqqfu, ma jibqax igawdi mill-protezzjoni legali offruta permezz tal-każ kriminali. Minkejja din it-twissija, huwa kkonferma li xorta waħda xtaq li l-każ jieqaf.
Il-prosekuzzjoni tmexxiet mill-Ispettur Christian Cauchi. L-imputata kienet assistita mill-avukat Anthea Zammit, filwaqt li l-avukat Franco Debono deher bħala parte civile għall-allegat vittma.
Il-każ ġie presedut mill-Maġistrat Claire Stafrace Zammit.