Sqalli ta’ 47 sena nżamm taħt arrest preventiv wara li ġie mixli bi traffikar ta’ 54 kilo kannabis b’valur ta’ €880,000.
Fabio Nastasi kien arrestat fi Spanja wara li l-Pulizija Maltija talbet għall-ħruġ ta’ Mandat ta’ Arrest Ewropew fil-konfront tiegħu. Huwa kien mixli b’pussess aggravat, traffikar u assoċjazzjoni bi skop ta’ traffikar.
Kien f’Ġunju li għadda meta l-Pulizija sabet id-droga f’appartament f’San Pawl il-Baħar u arrestat lil Santo Arena. Dan tal-aħħar kien akkużat b’pussess aggravat u traffikar tad-droga.
Fil-Qorti, Arena semma lil Nastasi bħala l-bniedem li ħallsu biex iżomm id-droga għandu. Il-Pulizija bdiet tfittxija għal Nastasi li meta sar jaf li kien qed jiġi mfittex, ħarab minn Malta.
Kien għalhekk li nħareġ mandat ta’ arrest Ewropew u 40 jum ilu l-Pulizija Maltija kienet infurmata li Nastasi ġie arrestat fi Spanja. Huwa ġie estradit lejn Malta biex setgħu jittieħdu passi kriminali kontrih. Fil-Qorti huwa wieġeb li ma kienx ħati tal-akkużi miġjubin kontrih.
Il-prosekuzzjoni qed titmexxa mill-Ispettur Mark Anthony Mercieca waqt li għall-imputat dehru l-Avukati Josè Herrera u Matthew Xuereb.
