Joseph Galea, żagħżugħ ta’ 25 sena, instab ħati li kien fil-pussess ta’ kannabis f’ċirkostanzi li jindikaw li d-droga ma kinitx maħsuba esklussivament għall-użu personali tiegħu.
Fis-sentenza mogħtija mill-Maġistrat Giannella Camilleri Busuttil fl-4 ta’ Ġunju, intqal li l-prosekuzzjoni ppruvat lil hinn minn kull dubju raġonevoli li l-kannabis misjuba fil-pussess tiegħu ma kinitx intiża biss għall-konsum personali.
Il-każ imur lura għal Awwissu tal-2019 meta uffiċjali tar-Rapid Intervention Unit waqqfu vettura fi Triq Kordin, Raħal Ġdid, wara li nnutaw li kellha twieqi skuri. Waqt tfittxija fuq Galea, li kien passiġġier fil-karozza, il-pulizija sabulu pakkett żgħir bil-kannabis.
Aktar tard, waqt li kien qed jiġi skortat lejn il-lock-up fil-Kwartieri Ġenerali tal-Pulizija fil-Furjana, Galea għadda lill-pulizija pakkett ieħor li kien moħbi fil-ħwejjeġ ta’ taħt tiegħu.
Analiżi forensika stabbiliet li l-kannabis elevata kienet tiżen total ta’ 51.14 gramma u kellha valur fit-triq stmat għal madwar €767.
Matul l-investigazzjonijiet, il-pulizija eżaminaw ukoll messaġġi misjuba fuq il-mobile tal-imputat. Il-qorti semgħet kif konversazzjonijiet fuq WhatsApp kienu jinkludu referenzi għal kwantitajiet ta’ kannabis, prezzijiet u laqgħat ma’ persuni f’lokalitajiet differenti, fosthom San Ġiljan u Buġibba.
Il-fatt li d-droga kienet maqsuma f’numru ta’ pakketti separati ta’ daqsijiet differenti, u li wħud minnhom kellhom marki numeriċi, tqies mill-qorti bħala indikazzjoni li d-droga ma kinitx maħsuba biss għall-użu personali.
Madankollu, il-qorti qieset ukoll evidenza ppreżentata minn esperti, fosthom il-psikologa Roberta Holland, li kkonkludiet li Galea kien qed ibati minn dipendenza serja fuq il-kannabis fiż-żmien meta twettaq ir-reat. Ir-rapport tagħha indika li huwa kien beda juża l-kannabis madwar l-età ta’ 16-il sena u li maż-żmien żviluppa dipendenza qawwija.
Fl-2023, il-Qorti assumiet il-funzjonijiet ta’ Drug Court u rreferiet lil Galea quddiem il-Bord għar-Riabilitazzjoni ta’ Persuni li Jwettqu Reati Marbuta mad-Droga. Dokumenti ppreżentati fil-kawża juru li huwa temm b’suċċess il-programm ta’ riabilitazzjoni, bil-bord jagħlaq formalment il-każ tiegħu f’Mejju tal-2025 wara li esprima sodisfazzjon bil-progress li kien għamel.
Meta ġiet biex tiddetermina l-piena, il-qorti qieset l-età tiegħu fiż-żmien tal-fatti, ir-rekord kriminali limitat tiegħu, il-fatt li ma wettaqx reati oħra relatati mad-droga minn dak iż-żmien ’l hawn, kif ukoll ir-riżultati pożittivi tal-proċess ta’ riabilitazzjoni.
Minflok sentenza ta’ ħabs, il-Qorti applikat id-dispożizzjonijiet tal-Att dwar id-Dipendenza fuq id-Droga (Kura minflok Priġunerija) u poġġiet lil Galea taħt ordni ta’ probation għal perjodu ta’ sentejn.
Huwa ġie ordnat ukoll iħallas €2,028.76 fi spejjeż relatati ma’ esperti fi żmien sitt xhur. Il-qorti ordnat ukoll il-qerda tad-droga elevata u tal-oġġetti relatati magħha ladarba s-sentenza ssir definittiva, sakemm dawn ma jkunux meħtieġa fi proċeduri kriminali oħra.
L-Avukati Michela Giglio u Joseph Giglio dehru għall-imputat.
