Libjan ta’ 40 sena ġie kkundannat sitt snin ħabs, wara li l-Qorti sabitu ħati li kixef il-parti privata tiegħu quddiem tifla ta’ 10 snin f’Marsalforn u li neżżaha.
Fil-Qorti, ġie spjegat li l-każ seħħ f’Ottubru ta’ sitt snin ilu, meta t-tifla kienet qiegħda miexja fi Triq il-Qbajjar filgħaxija u li allegatament l-akkużat daħal warajha fejn niżlilha l-qalziet u l-qalziet ta’ taħt, filwaqt li hu u jniżżel iż-żipp tal-qalziet tiegħu taha €30.
Ingħad li meta l-akkużat għamel hekk, it-tifla rranġat lilha nnifisha, ħarġet minn ġol-komun u marret titkellem ma missierha dwar dak kollu li kien għadu kif ġara. Fil-Qort ġie spjegat kif meta l-akkużat ġie arrestat, dan ċaħad l-akkużi miġjuba kontrih.
Min-naħa tiegħu, spejga li hu kellu argument fuq xi flus mal-ġenituri tat-tifla u li minħabba f’hekk, ivvintaw din l-istorja sabiex ipattuhielu. Żied li ma kinitx l-ewwel darba li għamlu t-tali akkużi fuq persuni oħra.
Fis-sentenza tagħha, il-Qorti ta’ Għawdex irrimarkat li kull persuna involuta fil-każ kellha bosta inkonsistenzi fix-xhieda tagħha iżda li fl-aħħar mill-aħħar, ix-xhieda tat-tifla kienet l-aktar waħda konsistenti.
Fid-dawl ta’ dan kollu, il-Qorti qalet li x-xhieda tat-tifla kienet l-aktar veritiera għaliex irrappurtat l-fatti kollha tal-każ bi ftit diskrepanzi u b’hekk tista’ tistrieħ fuqha.
Żiedet li ma tistax issib lill-akkużat ħati li wettaq att ta’ natura sesswali fuq it-tifla minħabba li jista’ jinstab ħati biss biha jekk ma jkunx hemm att ieħor ta’ natura sesswali li ma jammontax għal delitt ieħor. Dan apparti li ma nstabx ħati wkoll li huwa riċediv peress li ma tressqitx prova tas-sentenza tal-Qorti li nqatgħet kontrih.
Kien għalhekk li l-Maġistrat Simone Grech sabet lill-akkużat ħati li kkorrompa lit-tifla ta’ 10 snin u kkundannatu sitt snin priġunerija. Hu ġie ordnat iħallas €656 fi spejjeż tal-Qorti.
