Friday, April 19, 2024

Suċċess fi spezzjonijiet konġunti f’siti tal-kostruzzjoni madwar Malta

L-Awtorità għas-Saħħa u s-Sigurtà fuq il-Post tax-Xogħol (OHSA)

Carmen Cachia
Carmen Cachia
Ġurnalista

Aqra wkoll

L-Awtorità għas-Saħħa u s-Sigurtà fuq il-Post tax-Xogħol (OHSA), b’kollaborazzjoni mal-Awtorità Ewropea tax-Xogħol (ELA) u diversi entitajiet nazzjonali, ħabbret li wettqet b’suċċess sensiela ta’ spezzjonijiet koordinati madwar siti ta’ kostruzzjoni f’Malta. Dawn l-ispezzjonijiet huma parti minn inizjattiva usa’ tal-ELA biex tiżgura l-infurzar tar-regolamenti tas-saħħa u s-sigurtà, kif ukoll il-kundizzjonijiet tax-xogħol fl-Unjoni Ewropea (UE).

L-OHSA qiegħda tenfasizza l-importanza li jinżammu standards għoljin ta’ saħħa u sigurtà fuq is-siti ta’ kostruzzjoni. L-ispezzjonijiet reċenti, li nvolvew il-koperazzjoni tad-Dipartiment għar-Relazzjonijiet Industrijali u tal-Impjiegi (DIER), JobsPlus, il-Pulizija tal-Immigrazzjoni, u spetturi tax-xogħol Bulgari bħala osservaturi, jenfasizzaw il-valur tal-isforzi konġunti biex jinżammu dawn l-istandards.

Sfidi li jirrikjedu viġilanza kontinwa

Waqt l-ispezzjonijiet, ġew identifikati diversi irregolaritajiet inklużi armar perikoluż, riskji ta’ waqgħat mill-għoli u nuqqas ta’ konformità mal-liġijiet tax-xogħol bħal sahra mhux imħallsa u nuqqas ta’ kuntratti tax-xogħol xierqa. Dawn is-sejbiet jenfasizzaw l-isfidi kontinwi fl-industrija tal-kostruzzjoni u l-ħtieġa għal viġilanza kontinwa.

L-OHSA hija impenjata li taħdem flimkien ma’ entitajiet oħra, bħall-ELA, biex twettaq dawn l-ispezzjonijiet vitali. L-ispezzjonijiet konġunti mhux biss jissimplifikaw il-proċess ta’ infurzar, iżda jrawmu wkoll kultura ta’ konformità u sigurtà li tipproteġi lill-ħaddiema kollha.

L-OHSA qiegħda tħeġġeġ lill-istakeholders kollha fl-industrija tal-kostruzzjoni biex jagħtu prijorità lis-saħħa u s-sigurtà u biex jikkonformaw mar-regolamenti kollha. Jekk isir dan, inkunu qegħdin niżguraw ambjent tax-xogħol aktar sigur għal kull min huwa involut u nkomplu nibnu settur tal-kostruzzjoni reżiljenti u responsabbli.

Għal aktar informazzjoni dwar is-saħħa u s-sigurtà fuq il-post tax-xogħol, wieħed jista’ jagħmel kuntatt mal-OHSA fuq 21247677 jew jibgħat email: [email protected]

ĦALLI RISPOSTA

Jekk jogħġbok ikteb il-kumment tiegħek!
Jekk jogħġbok iktebismek hawn

Sport