Fi tmiem tas‑16‑il edizzjoni tal‑BOV Volleyball Marathon, inġabret is‑somma rekord ta’ €707,586, li saret għall‑ewwel darba fl-MFCC f’Ta Qali bejn il-Ħamis 16 u s-Sibt 18 ta’ Lulju 2026.
40 plejer, li ffurmaw ħames timijiet, baqgħu jilagħbu għal 53 siegħa mingħajr waqfien. Il‑Maratona li bdiet il‑Ħamis filgħaxija ġiet inawgurata uffiċjalment mill‑E.T. Dott. Myriam Spiteri Debono, President ta’ Malta.
Mons. Martin Micallef, id-Direttur tad‑Dar tal‑Providenza, irringrazzja lill‑poplu Malti u Għawdxi, li għal darba oħra wieġeb b’tant ġenerożità għas‑sejħa li saret biex jinġabru l‑fondi għad‑Dar. Huwa rringrazzja wkoll lill‑plejers, lill‑volontiera, lill‑membri tal‑kumitat organizzattiv, l‑isponsors kollha, l‑istazzjonijet ewlenin tat‑televixin li xandru din il‑maratona, preżentaturi, kantanti u bands, lill‑pulizija, lill‑Banda tal‑Forzi Armati ta’ Malta u lil dawk kollha li b’xi mod jew ieħor għenu biex din il‑Maratona tkun suċċess.
Sa mit‑twaqqif tagħha fl‑1965, Id‑Dar tal‑Providenza offriet servizzi residenzjali personalizzati għal persuni b’diżabilità, f’ambjent ta’ sapport.